अभिनेता शाहिद कपूरको ब्लकबस्टर फिल्म ‘कबीर सिंह’ को क्रेज कम हुने अझैसम्म कुनै संकेत देखिएको छैन । 'उरी' र 'भारत' भन्दा सबैभन्दा धेरै कमाउँदै बलिउडको सबैभन्दा ठूलो फिल्म साबित भएको यसले भारतमा मात्र २ सय ५० करोडभन्दा बढीको व्यापार गरिसकेको छ । शुक्रबार रिलिज भएको ऋतिक रोशनकोे फिल्म 'सुपर ३०' ले समेत यो फिल्मलाई खासै असर गरेको छैन ।
उक्त फिल्मले चौथो हप्ताको शनिबारसम्म २ सय ५५ करोड ८९ लाखको व्यापार गरेको व्यापार विशेषज्ञ तरण आदर्शले ट्विटमार्फत् जानकारी दिएका छन् । ‘कबीर सिंह’ को व्यापार यही रफ्तारमा अगाडि बढे ३ सय करोडको लाइफटाइम कलेक्सन गर्ने अनुमान गरिएको छ । सन् २०१३ मा आएको फिल्म 'आर.राजकुमार' पछि शाहिदको यो पहिलो सोलो सुपरहिट फिल्म हो ।
‘कबीर सिंह’ मा उनले एक आत्म-विनाशकारी प्रेमीको भूमिका निभाएका छन् । यो फिल्मको सफलतासँगै अभिनेता शाहिदको चर्चा निकै चुलिएको छ । भारतसँगै यसले नेपालमा पनि जबरजस्त व्यापार गरिरहेको छ । चौथो हप्तामा पनि नेपालमा फिल्म हेर्ने दर्शकको चाप घटेको छैन । उक्त फिल्मको नेपाल प्रदर्शन अधिकार स्टेशन फाइभले लिएको हो ।
‘कबीर सिंह’ साउथ सुपरस्टार विजय देवरकोन्डाको हिट फिल्म 'अर्जुन रेड्डी' को हिन्दी रिमेक हो । तेलुगूमा यो फिल्मलाई सन्दिप वांगा रेड्डीले निर्देशन गरेका हुन् । फिल्मको हिन्दी रिमेकको निर्देशक तथा निर्माता पनि उनी स्वयं हुन् । शाहिदको जबरजस्त अभिनय रहेको यसमा सोहम मजूमदार, अर्जन बाजवा, सुरेश ओबेरोय, कामिनी कौशल र निकिता दत्ताको पनि अभिनय छ ।
