बलिउडका ह्यान्डसम अभिनेता कार्तिक आर्यनले लगातार हिट फिल्मबाट इन्डस्ट्रीमा आफ्नो लागि खास स्थान बनाइसकेका छन् । उनी अहिले बलिउड अभिनेता सैफ अली खानको हिट फिल्म ‘लभ आज कल’ को दोस्रो पार्ट ‘लभ आज कल २’ मा व्यस्त छन् । यसमा उनको अपोजिटमा अभिनेत्री सारा अली खान देखिँदैछिन् ।
योसँगै कार्तिक फिल्म ‘भूल भुलैया’ को सिक्वेलमा पनि देखिने सम्भावना प्रवल छ । ‘भूल भुलैया २’ का मेकर्सले यो फिल्मका लागि उनको नाम फाइनल गरेका छन् । यसमा उनीसँगै अभिनेता अक्षय कुमार पनि देखिन सक्नेछन् । ‘लभ आज कल २’ लगत्तै कार्तिकले भूमि पेडनेकर र अनन्या पान्डेसँग फिल्म ‘पति पत्नी और वो’ को छायांकन सुरु गर्दैछन् ।
कार्तिकले हालै ‘भूल भुलैया २’ का निर्मातासँग भेट गरेका छन् र उनलाई फिल्मको आइडिया मन परेको छ । सबै कुरा सन्तुलन रहेको खण्डमा कार्तिकले ‘भूल भुलैया’ फ्रेन्चाइजलाई अगाडि लैजानेछन् । ‘भूल भुलैया’ एक हरर कमेडी फिल्म थियो, जसमा विद्या बालनको भूमिका निकै रहस्यमयी देखाइएको थियो । अभिनेता अक्षय कुमार पनि लिड रोलमा थिए ।
कार्तिकको कुरा गर्ने हो भने उनी पछिल्लो पटक अभिनेत्री कृति सेननसँग फिल्म ‘लुका छुपी’ मा देखिएका थिए । फिल्मले बक्सअफिसमा राम्रो व्यापार गरेको थियो । दर्शकले पनि फिल्म रुचाएका थिए । कार्तिक केही समययता अभिनेत्री सारा अली खानसँग निकै नजिक छन् । दुई प्रेममा रहेको चर्चा छ । तर, दुबैले यस बारेमा कुनै जानकारी दिएका छैनन् ।
