चलचित्र संघ र चलचित्र विकास बोर्डले चाडै नै पत्रकार सम्मेलन गरेर काठमाण्डौका मल्टिप्लेक्समा निर्मातालाई दिइएको नयाँ सुविधाको बारेमा जानकारी गराउने भएका छन् । मल्टिप्लेक्स हलमा निर्माताले व्यहोर्दै आएको चर्को शोषणबाट केही हदसम्म उनीहरु मुक्त हुने भएका छन् ।
बिकास बोर्डको पहलमा चलचित्र संघले लागू गर्न लागेको नयाँ नियम अनुसार अब मल्टिप्लेक्समा नेपाली फिल्मले पहिलो हप्ता ५० प्रतिशत शेयर पाउनेछन् । यस्तै दोश्रो हप्ता ४२.५ प्रतिशत शेयर निर्माताले पाउने भएका छन् । फिल्म बनाउने निर्माताले भन्दा हलले धेरै शेयर लैजादा निर्मातालाई लगानी उठाउन नै धौ धौ भएको अवस्था थियो । विकास बोर्डका अध्यक्ष राजकुमार राइले चलचित्र संघले हलमा पत्र काटिसकेको जनाएका छन् ।
यस्तै, फिल्म हलमा अब ३ हप्तासम्म हल ट्रेलर बजाएको रकम निर्माताले तिर्न नपर्ने भएको छ । जुन हलमा फिल्म लाग्दैछ, त्यही हलमा ट्रेलर बजाउँदा पनि निर्माताले रकम तिर्नुपर्ने वाध्याता थियो । जबकी मल्टिप्लेक्सका संचालकहरुले भने हलमा बलिउड र हलिउडका ट्रेलर निशुल्क बजाउने गर्थे र प्रचार गर्थे ।