अभिनेत्री रेखा थापा १२ बर्षदेखि फिल्म क्षेत्रमा छिन् । रेखाले निर्माता छविराज ओझासँग मिलेर बनाएका र अभिनय गरेका धेरै फिल्म सफल छन् । तर, रेखा फिल्मस्लाई छाड्ने हो भने रेखाको नाममा सफल फिल्मको संख्या कम छ ।
केही बर्षयता त रेखाका लागि ब्यानर बाहिरका फिल्ममा सफलता पाउनु भनेको फलामको चिउरा चपाए जस्तै छ । तर, रेखा आफ्नो ब्यानरमा भने हिट छिन् । रेखा फिल्मस्को ब्यानरमा बर्षमा एउटा फिल्म मेकिङ गर्ने रेखाको उक्त फिल्मले व्यापारमा उल्लेखनिय सफलता पाएकै छ ।
उनै रेखाको मुख्य भूमिका रहेको फिल्म ‘जाउँ हिड पोखरा’ मंसिर ११ गतेबाट लाग्दैछ । शोभित बस्नेतको यो फिल्म रेखाकै स्टारडमको भरमा देखिएको छ । आफ्नो ब्यानर बाहिर असफल भैरहेकी रेखाका लागि ८० वटा हलमा ‘जाउँ हिड पोखरा’ हेर्न दर्शकलाई होल्ड गर्नुपर्ने चुनौती छ ।
हुनत, यो फिल्ममा जीवन लुइटेल पनि छन् । तर, शोभितले रेखालाई नै अगाडि सारेका छन् । वुझिएअनुसार रेखालाई नै शोभितले प्रिमियरको जिम्मा दिएका छन् । रेखा थापा बाहिरी ब्यानरमा सफल होलिन् कि असफल, मंसिर ११ गतेसम्म पर्खनै पर्छ ।
