Nepal's No.1 Filmy Web Magazine
गत सोमबार र मंगलबार भएको जेनजी पुस्ताको आन्दोलनले केपी शर्मा ओली नेतृत्वको शक्तिशाली गठबन्धन सरकार ढलाएपछि शुक्रबार नेपालको पहिलो महिला प्रधानमन्त्री बनेकी सुशीला कार्कीलाई यतिबेला सामाजिक सञ्जालमा बधाईको ओइरो लागेको छ । कलाकारहरूले पनि उनी प्रधानमन्त्री बनेकोमा खुसी व्यक्त गर्दै देश नयाँ युगमा प्रवेश गरेको प्रतिक्रिया दिएका छन् ।
अभिनेता तथा निर्माता दीपकराज गिरीले जेनजी पुस्ताको आन्दोलनपछि आफूले निरन्तर धम्कीको सामना गर्नुपरेको दाबी गरेका छन् । शुक्रबार फेसबुकमा एक पोस्ट लेख्दै उनले कलाकार भएर जेनजीलाई आन्दोलन गर्न उकासेको र उनीहरूतिर लागेको भन्दै केही सरकार पक्षधरले आफूलाई म्यासेज र फोनमार्फत धम्की दिएको बताएका छन् ।
गत सोमबार र मंगलबार भएको जेनजी आन्दोलनको विषयलाई भारतीय मिडियाहरुले निकै प्राथमिकता दिए । नेपालमै आएर समेत भारतीय पत्रकारले रिपोर्टिङ गरे । जेनजीको आन्दोलनपछि भारतीय मिडियाले नेपालका राजनीतिज्ञ, कलाकार, उद्योगपति र खेलाडीहरुको बारेमा विशेष सामग्री तयार पारिरहेका छन् । यसैक्रममा अभिनेता राजेश हमाल पनि चर्चाको विषय बनेका छन् ।
कलाकार मदनकृष्ण श्रेष्ठले अब युवापुस्तालाई नेतृत्वको जिम्मा दिनुपर्ने बताएका छन् । उनले फेसबुकमा एक पोस्ट लेख्दै ५० वर्ष पहिलेका युवाभन्दा अहिलेका युवा बौद्धिक रहेकाले उनीहरूलाई नै नेतृत्वको जिम्मेवारी दिनुपर्ने धारणा व्यक्त गरेका हुन् । उनले समय अनुसार नहिँड्नेलाई समयले छोडिदिन्छ भन्ने कुरा जेनजी आन्दोलनले प्रष्टसँग देखाएको पनि उल्लेख गरेका छन् ।
सोमबार जेनजीको प्रदर्शनमा सरकारको बर्बर दमनबाट मृत्यु भएका १९ जनाको शोकमा मंगलबार देशभरका हलहरू बन्द भए । हल व्यवसायी र वितरकहरूको छाता संस्था नेपाल चलचित्र संघको आह्वानमा हलहरू बन्द गरिएको थियो । मंगलबार जेनजी आन्दोलनले हिंसात्मक मोड लिएपछि बुधबार पनि हलहरू बन्द रहने भएका छन् ।
यही भदौ २७ गतेबाट प्रदर्शनमा आउने भनिएको फिल्म ‘अभिमन्यु’ तोकिएको मितिमा रिलिज नहुने भएको छ । सोमबार जेनजी पुस्ताको आन्दोलनपछि उत्पन्न परिस्थितिलाई मध्यनजर गर्दै फिल्मको प्रदर्शन स्थगन गरिएको हो । निर्माता कम्पनी सेभेन सिज सिनेमाका अध्यक्ष विनोद पौडेलले विज्ञप्ति जारी गर्दै फिल्मको नयाँ प्रदर्शन मिति चाँडै घोषणा गरिने जानकारी दिए ।
