Nepal's No.1 Filmy Web Magazine
पछिल्लो समय राजनीतिप्रति कलाकारको आकर्षण बढ्दो छ । पुराना हुन् वा नयाँ कलाकार, विभिन्न राजनीतिक पार्टीसँग आबद्ध हुँदै आएका छन् । यसैक्रममा, ‘ह्यान्डसम भिलेन’को रुपमा चिनिएका अनुपविक्रम शाही नेपाली कांग्रेसमा प्रवेश गरेका छन् । शुक्रवार कांग्रेस नेता तथा गृहमन्त्री बालकृष्ण खाँणले उनलाई पार्टी सदस्यतासँगै नेपाल तरुण दलको सदस्यता पनि प्रदान गरे ।
आगामी भदौ ३१ गतेबाट प्रदर्शनमा आउन लागेको सुरेन्द्र पौडेल निर्देशित फिल्म ‘बाबरी’बाट एक समयकी चर्चित अभिनेत्री तृप्ति नाडकरका छोरा धिरज टोटलानी (नाडकर) ले अभिनेताको रुपमा डेब्यू गरेका छन् । तर, फिल्मको फर्स्टलुकदेखि दुई गीत सार्वजनिक हुँदासम्म निर्माण टिमले उनलाई लुकाएको थियो । बिहीवार सार्वजनिक तीनवटा पोस्टरहरुमा भने उनी अटेका छन् ।
दीपेन्द्र के. खनालले निर्देशन गर्न लागेको फिल्म ‘चङ्गा चेट २’मा अभिनेता विपिन कार्की भित्रिएका छन् । बिहीवार उनीसँग निर्मात्री शर्मिला पाण्डेले कागजी सम्झौता गरेकी हुन् । विपिनले फिल्मको कथावस्तु र भूमिका मन परेपछि काम गर्न लागेको बताएका छन् । दीपेन्द्रसँग उनको यो तेस्रो जुगलबन्दी हो । यसअघि उनीहरुबीच ‘पशुपति प्रसाद’ र ‘के घर के डेरा’मा सहकार्य भएको थियो ।
चलचित्र विकास बोर्डका नवनियुक्त अध्यक्ष भुवन केसीविरुद्ध सर्वोच्च अदालतमा रिट दर्ता भएको छ । बोर्ड अध्यक्षका लागि आवेदन दिएकामध्ये नरेश कुमार पौडेलले बिहीवार अदालतमा केसीविरुद्ध रिट दायर गरेका हुन् । सर्वोच्चको वेबसाइटमा भुवनविरुद्ध रिट दर्ता भएको उल्लेख छ । अध्यक्ष पदमा आवेदन दिएका अन्य फिल्मकर्मीहरुको समर्थनमा निर्देशक समेत रहेका पौडेलले रिट निवेदन दिएको जानकारी प्राप्त छ ।
अभिनेता पुष्प खड्काले ‘मंगलम’पछि फिल्म ‘कृष्ण लीला’मा चुनौतीपूर्ण चरित्रमा अभिनय गरेका छन् । भदौ ३ गतेबाट रिलिज हुन लागेको फिल्ममा उनी सुस्त मनस्थिति (अटिजम) भएको युवकको भूमिकामा देखिँदैछन् । कृष्ण पात्रको लीलासँग प्रेम र अटिजम भएका कारण उसको प्रेममा आउने उतार-चढावमा फिल्म केन्द्रित छ । ट्रेलर हेर्दा पुष्पले चरित्र निर्माणमा गरेको मेहेनत देखिन्छ ।
विपिन कार्की उम्दा अभिनय गर्ने कलाकार हुन् । हरेक प्रकारको भूमिकामा उनले जीवन्त अभिनय गर्न सक्छन् । त्यसैले यतिबेला उनको नेपाली फिल्ममा ठूलो माग छ । आफ्नो मागअनुसार उनले पारिश्रमिकमा पनि बढाइरहेका छन् । तर, फिल्म ‘प्रसाद २’को छायांकन सेटमा उनले स्टोरी बोर्ड बिना अभिनय नै नगर्ने बताएपछि छायांकन रोकिएको घटनाले उनलाई विवादमा ल्याएको छ ।
