Nepal's No.1 Filmy Web Magazine
दीपक वलीको निर्देशनमा बन्न लागेको फिल्म ‘कामिनो’मा कलाकारको लाइनअप बलियो बनेको छ । अभिनेता प्रदीप खड्कालाई मुख्य भूमिकामा अनुबन्ध गर्दै कलाकार छनोट प्रक्रियामा अगाडि बढेको निर्माण टिमले वर्षा सिवाकोटी, राजबल्लभ कोइराला र नीति शाहपछि अब फिल्ममा सौगात मल्ललाई अनुबन्धित गरेको छ । उनीसँग निर्माण टिमले शुक्रबार लिखित सम्झौता गरेको हो ।
२०७३ सालको सफल फिल्म ‘पशुपति प्रसाद’को चरित्र केन्द्रित सिक्वेल ‘पशुपति प्रसाद २ : भष्मे डन’ छायांकनमा निस्किएको छ । शुक्रबार काठमाडौंस्थित पशुपति परिसरबाट छायांकन सुरु भएको फिल्मको पहिलो दृश्य अभिनेता विपिन कार्कीको कैद गरियो । सुटिङ सेटबाट बाहिरिएको एउटा तस्विरमा उनी भष्मे डनको गेटअपमा देखिएका छन् । उनले कपाल समेत मुण्डन गरेका छन् ।
नयाँ वर्षको दिन पारेर आगामी बैशाख १ गतेबाट चार फिल्म ‘नाईं नभन्नू ल ६’, ‘जारी’, ‘बिहे पास’ र ‘बुलाकी’ प्रदर्शनमा आउँदैछन् । चारवटै फिल्म यो मितिबाट डगमगाउने देखिएका छैनन् । आज शुक्रबार यी चारवटा फिल्मबीच प्रचार सामाग्री सार्वजनिक गर्न प्रतिस्पर्धा नै चल्यो । ‘जारी’ र ‘बिहे पास’को ट्रेलर रिलिज हुँदा ‘नाईं नभन्नू ल ६’ र ‘बुलाकी’को भने गीत सार्वजनिक गरिएको छ ।
फिल्म ‘नाईं नभन्नू ल’को पाँचौं सिरिजको चर्चित गीत ‘तिम्रो आँखामा आँखा जुधाई’लाई मेल भर्सनमा तयार गरेर फिल्म ‘नाईं नभन्नू ल ६’मा समावेश गरिएको छ । शुक्रबार युट्युबमा सार्वजनिक गीतमा गायक प्रताप दासको स्वर छ । फिमेल भर्सनमा भने मेलिना राईको स्वर थियो । यद्यपि, मेल भर्सनको गीतको केही हरफ परिवर्तन गरिएको छ भने संगीत पनि फिमेल भर्सनभन्दा फरक छ ।
प्रवेश पौडेल निर्देशित फिल्म ‘बिहे पास’को ट्रेलर सार्वजनिक गरिएको छ । शुक्रबार यूट्युबमा सार्वजनिक ट्रेलर कमेडीले भरिएको छ । दयाहाङ राईको चरित्रले श्रीमती (प्रकृति श्रेष्ठ)को खुसीका लागि सरकारी जागिरमा नाम निकाल्न गर्ने संघर्षमा ट्रेलर घुमेको छ । दयाहाङले आफ्नो एउटा झुट लुकाउन एकपछि अर्को झुट बोल्दा वैवाहिक सम्बन्ध संकटमा परेको पनि ट्रेलरमा देखाइएको छ ।
‘कबड्डी’ सिरिजका लेखक तथा झाँक्रीको भूमिकामार्फत् चर्चामा आएका उपेन्द्र सुब्बा निर्देशित फिल्म ‘जारी’को ट्रेलर सार्वजनिक गरिएको छ । शुक्रबार राजधानीमा एक कार्यक्रमका बीच सार्वजनिक गरिएको झन्डै चार मिनेटको ट्रेलरमा सन्तान नहुँदा लिम्बू दम्पती (दयाहाङ राई र मिरुना मगर) बीच उत्पन्न हुने कलह र लिम्बू परम्परामा प्रचलनमा रहेको जारी प्रथालाई देखाइएको छ ।
