Nepal's No.1 Filmy Web Magazine
फिल्मको हकमा प्रदर्शनको ५१औं दिन सफलताको मानक मानिन्छ । रिलबाट फिल्म खिच्ने जमानामा प्रदर्शनको ५१औं र सय दिन सामान्य मानिने गरिएको भए पनि डिजिटल युगसँगै यसको बेग्लै अस्तित्व र महत्त्व छ । स्वदेशी र विदेशी फिल्मको चुनौतीलाई झेल्दै ५१औं दिन मनाउनु आफैंमा महाभारतको युद्ध हो । यो युद्धमा यस वर्ष दुई फिल्म ‘कबड्डी ४’ र ‘महापुरुष’ले सफलता पाए ।
तीजमा फिल्म प्रदर्शन गर्न हरेक वर्ष निर्माताबीच हानाथाप हुने गर्छ । फिल्म निर्माण नहुँदै तीजलाई प्रदर्शन मिति घोषणा गरिन्छ । यसपालि असोज १ गते तीज छ । र, असोज ३ गते संविधान दिवस छ । एउटै विदा नहुँदा त भिड्न नछाड्ने नेपाली निर्माता दुई दिनको विदा अरुलाई टीका लगाएर दिन किन तयार हुन्छन् र ! आगामी तीजमा पनि नेपाली फिल्मबीच ठूलो भिडन्त हुन सक्नेछ ।
यस वर्षको अन्तिम फिल्मको रुपमा ‘बहाव’ आज शुक्रबारबाट प्रदर्शनमा आएको छ । फिल्म ‘प्रसाद २’लाई उच्च अदालत पाटनले निर्माताबीचको आर्थिक लेनदेनका कारण प्रदर्शनमा अंकुश लगाएपछि सोलो रिलिज पाएको फिल्मलाई मल्टीप्लेक्सहरुले औसत शो दिएका छन् भने सिंगल थिएटर दुई दर्जन बढी मिलेको छ । फिल्मलाई हलमा टिकिराख्न बलियो ‘वर्ड अफ माउथ’ चाहिनेछ ।
नयाँ वर्षको अवसर पारेर आगामी बैशाख १ गतेबाट प्रदर्शनमा आउन लागेको उपेन्द्र सुब्बाद्वारा निर्देशित फिल्म ‘जारी’को ट्रेलरले दर्शकमा एकखालको उत्सुकता जगाएको छ । फिल्म दृश्यभाषामा सशक्त हुनसक्ने आँकलन धेरैको छ । बलशाली ट्रेलर, ‘चरी बस्यो’ गीतको लोकप्रियता र बलियो स्टारकास्टका कारण नेपालमा मात्र होइन, विदेशमा समेत फिल्मको पखाई अधैर्य बनेको छ ।
एक घटनाका कारण ठ्याक्कै एक वर्ष जेल जीवन विताएर फर्किएका अभिनेता तथा मोडल पल शाह एक महिना परिवारसँग समय विताएपछि आफ्नो रोजीरोटीको काममा फर्किएका छन् । उनी एक वर्षपछि म्यूजिक भिडियोमार्फत छायांकनमा फर्किएका हुन् । बिहीबार मुस्ताङ वरपर छायांकन भइरहेको ‘आँशु बनी नखस कैले नि’ बोलको रोमान्टिक गीतमा पलले अभिनय गरिरहेका छन् ।
निर्देशक निश्चल बस्नेतले फिल्म ‘टलकजंग भर्सेस टुल्के’ रिलिजपछि ‘दिमाग खराब’ नाममा फिल्म बनाउने तयारी गरेका थिए । तर, चलचित्र विकास बोर्डमा नाम दर्ता नगरी फिल्म घोषणा गरिएकाले उक्त नाम अर्कै कम्पनी उम्कायो । तर, तीन वर्षसम्म यो नाममा फिल्म नबनेपछि निर्माण इजाजत रद्द भयो । र, निश्चलले आफ्नो कम्पनीबाट आफैं निर्देशक रहने गरी उक्त नाम बोर्डमा दर्ता गरे ।
