Nepal's No.1 Filmy Web Magazine

आगामी कात्तिक १४ गतेबाट प्रदर्शनमा आउन लागेको फिल्म ‘परान’को पहिलो गीत ‘ओइ भन्दानी बोलेन’ सार्वजनिक गरिएको छ । आइतबार काठमाडौंमा एक कार्यक्रमको आयोजना गर्दै दशैंको कोसेली स्वरूप दर्शकमाझ ल्याइएको यस गीतमा गायकतर्फ प्रमोद खरेल, यमन श्रेष्ठ र रिदम कँडेल तथा गायिकातर्फ रचना रिमाल र सलिना विकको स्वर समावेश छ ।

१६ वर्षअघिको चर्चित टेलिसिरियल ‘मदनबहादुर–हरिबहादुर’मा अभिनेता हरिवंश आचार्यले निर्वाह गरेको हरिबहादुर पात्र बुमर्स पुस्तादेखि जेनेरेसन जेड (जेनजी)सम्म लोकप्रिय छ । अब सोही पात्रलाई दर्शकले ठूलो पर्दामा हेर्न पाउनेछन् । यही सोमबार (फूलपाती)बाट प्रदर्शन हुन लागेको फिल्म ‘हरिबहादुरको जुत्ता’मा हरिवंश स्वयंले हरिबहादुरको भूमिका निभाएका छन् । 

दशैंको फूलपाती (१३ असोज)बाट प्रदर्शन हुन लागेको फिल्म ‘बलिदान’को नयाँ गीत ‘बाङ्गा बाङ्गा’ सार्वजनिक गरिएको छ । यस गीतमा सुजन चापागाईँले संगीत तथा सुजन र भुषण खतिवडाले स्वर दिएका छन् भने शब्द हर्क साउदको रहेको छ ।

असोज ३१ गतेबाट प्रदर्शनमा आउन लागेको फिल्म ‘जेरी अन टप’को दोस्रो गीत ‘कुरौनी’ सार्वजनिक गरिएको छ । तामाङ सेलो शैलीमा आधारित यस गीतमा कालीप्रसाद बाँस्कोटा र सोमिया बराइलीको युगल गायन रहेको छ भने काली स्वयंको शब्द तथा संगीत छ । धेरैपछि नेपाली फिल्ममा तामाङ सेलो समावेश गरिएको हो । यो गीतले दर्शकमा नृत्यभाव जगाउने देखिन्छ ।

यही असोज १३ गतेबाट प्रदर्शनमा आउन लागेको फिल्म ‘माइतीघर’मा स्थापित कलाकारहरूको पल्टन नै छ । केदार घिमिरे, प्रकाश सपूत, धीरज मगर, उपासना सिंह ठकुरी, युवराज लामा, बुद्धि तामाङ लगायतको अभिनय रहेको यो फिल्ममा तामाङ संस्कृति र त्रिकोणात्मक प्रेमकथालाई प्रस्तुत गरिएको छ । ट्रेलर हेर्दा फिल्ममा धीरज नकारात्मक भूमिकामा रहेको संकेत मिल्छ ।

नेपालको अग्रणी ओटीटी प्लेटफर्म सिनेमाघर एपले ‘दशैं–तिहार मुभी मेला’ अन्तर्गत चार फिल्म एकसाथ रिलिज गरेको छ । दशैं र तिहारको माहोलमा घरमै बसेर फिल्म हेर्न चाहने दर्शकका लागि एपमा ‘पिताम्बर’, ‘गाउँ आएको बाटो’, ‘होस्टेल ३’, र ‘फेरि रेशम फिलिली’ रिलिज गरिएको हो । यी प्रत्येक फिल्मको शुल्क १९९ रुपैयाँ तोकिएको छ ।