नेपाली फिल्म ‘निशानी’ले पोखरामा दर्शकको राम्रो साथ पाएको छ । शनिबारको तीन वटै शो हाउसफुल रहेकोमा पोखरेली दर्शकले फिल्म राम्रो बनेको प्रतिक्रिया दिए । पोखरेली दर्शकसंगै फिल्म हेर्न हलमा पुगेकी नायिका अनु गुरुङलाई शनिबार दर्शकहरुको प्रतिक्रिया लिन भ्याईनभ्याई थियो । र, साथमा थिए फिल्मका अर्का कलाकार सुरज रानाभाट ।
अनु र सुरज दुवै पोखराकै हुन् । त्यसैले पनि पोखरेली दर्शकको प्रतिक्रिया उनीहरुको लागि विशेष थियो । ‘आफूले पहिलो पटक अभिनय गरेको फिल्म आफ्नै घरपरिवार, आफन्त र साथीभाईसंगै बसेर हेरौँ भनेर म पोखरा आएकी हुँ’, काठमाण्डौ बस्दै आएकी नायिका अनु गुरुङले भनिन्–‘पोखरेली दर्शकले म र मेरो फिल्मप्रति देखाएको सद्भावप्रति म निकै आभारी छु ।’ उता नायक सुरज रानाभाट पनि फिल्मको प्रतिक्रियाले निकै मख्ख देखिएका थिए ।
हल संचालकका अनुसार पोखरामा निशानीले राम्रो कलेक्सन गरिरहेको छ । शुक्रबार र शनिबार निशानी हेर्ने दर्शकहरुको भीड निकै बाक्लो रहेको हल संचालकले बताए । लाहुरे सँस्कृतिमा आधारित लभस्टोरी बेस्ड फिल्म निशानीमा प्रशान्त तामाङ मुख्य अभिनेता हुन् । उनीसंगै अनु गुरुङ, सुरज रानाभाट, विष्णु चेम्जोङ, प्रेम सुब्बा लगायतका कलाकारहरुको अभिनय रहेको छ ।
प्रेम सुब्बाले निर्माण गरेको फिल्मलाई विनोद सेरेङले निर्देशन गरेका हुन् । फिल्ममा प्रचारप्रसारसहित करिब ८० लाख रुपैँया खर्च भएको निर्माणपक्षले जानकारी दिएको छ । भारतमा समेत सेन्सर पास भएको फिल्म 'निशानी' नेपालसहित भारतका हलहरुमा समेत प्रदर्शन हुने निर्माणपक्षले जनाएको छ ।
