यही शुक्रबारबाट देशभर प्रदर्शनमा आउने फिल्म 'निशानी'को भोली बिहीबार प्रेस शो राखिएको छ । दरवारमार्गमा अवस्थित क्यूज सिनेमाजमा बिहान ११ बजे फिल्मको शो राखिएको निर्माण युनिटले जनाएको छ ।
कार्गिल युद्धको खलुबार लडाइँमा कमान्डिङ गरेका भारतीय गोर्खा ललित राईका अनुभवमा आधारित कथामाथि बनेको 'निशानी' हेर्न निर्माण युनिटले पत्रकारहरूलाई निमन्त्रणा समेत गरेको छ । 'पत्रकारहरूकै सहयोगले हामी यो दर्शकसामु फिल्म लिएर आउन सक्षम भएका छौं । त्यसैले भोलीको बिशेष शो पत्रकारहरूका लागि नै हो', फिल्मको पब्लिसिटी डिजाईन गरिरहेका विपिन मल्लले भने ।
सिक्किम, इलाम चियाबारी, लमजुङ घलेगाउँ लगायतका स्थानहरुमा छयांकन गरिएको फिल्मलाई धरानका फिल्मकर्मी प्रेम सुब्बाले निर्माण गरेका हुन् । फिल्ममा सरोज भण्डारी, ललिता सेरेङ धौबडेल र किशोर दुङमाली राई निर्माताका रुपमा छन् । फिल्ममा प्रशान्त तामाङ, प्रेम सुब्बा, जयनन्द लामा, सिरु बिष्ट, कोपिला थापा, सुरज भट्ट, अनु गुरुङ, बिष्णु चेम्जोङ लगायतको अभिनय रहेको छ ।
‘निशानी'मा निर्देशक विनोद सेरेङको पटकथा लेखन, युवराज राईको छायांकन, जनक गुरुङको द्वन्द्व निर्देशन, गोविन्द राई र शिव बिकको नृत्य निर्देशन, बिबी अनुरागीको संगीत, विपिन मल्ल र सुरज श्रेष्ठको सम्पादन छ ।
