सरकारले काठमाडौं उपत्यकामा अत्याधुनिक फिल्म स्टुडियो निर्माण गर्ने घोषणा गरेको छ । बुधवार आर्थिक वर्ष २०७६/७७ को बजेट प्रस्तुत गर्दै अर्थमन्त्री डा. युवराज खतिवडाले काठमाडौंमा अत्याधुनिक सुविधा सम्पन्न फिल्म स्टुडियो निर्माण गरिने घोषणा गरेका हुन् । तर, सरकारले स्टुडियो निर्माणका लागि बजेट भने विनियोजन गरेको छैन ।
राजधानीमा अत्याधुनिक स्टुडियो निर्माण हुने भएपछि चलचित्रकर्मीको मुहारमा खुसी छाएको छ । आगामी वर्ष 'छायांकनका लागि नेपाल' भन्ने कार्यक्रम पनि सुरु गर्ने अर्थमन्त्री खतिवडाले बजेट भाषणमा बताएका छन् । यस्तै, बजेटमा श्रमजीवि चलचित्रकर्मीलाई सामाजिक सुरक्षाको दायरामा ल्याइने पनि जनाइएको छ ।
बजेट अभावले वर्षौदेखि निर्माण हुन नसकेको दोलखाको डाङडुङे डाँडामा अन्तर्राष्ट्रिय स्तरको फिल्म सुटिङ स्टुडियो यस वर्षको बजेटमा समेटिएको छैन । शिलन्यास भएर पनि बजेट अभावका कारण दोलखामा सुटिङ स्टुडियो निर्माण हुन नसकेको हो । अब, सरकारले राजधानीमै सुविधा सम्पन्न 'इनडोर स्टुडियो' निर्माण गर्ने भएको छ ।
हरेक वर्ष सरकारले प्रस्तुत गर्ने बजेटमा नेपाली फिल्म क्षेत्र प्राथमिकतामा पर्न सकेको छैन । यस वर्ष पनि यसले निरन्तरता पाएको छ । सरकारले फिल्म क्षेत्रको विकासमा लागि कुनै शिर्षकमा बजेट छु्ट्याएको छैन । गत वर्ष सरकारले बक्स अफिसका लागि बजेट विनियोजन गरेको थियो । तर, यस वर्षको बजेटमा बक्स अफिस अटाएको छैन ।
