दशैंको फूलपाती अर्थात् असोज ३० गतेलाई प्रदर्शन मिति घोषणा गर्दै अशोक शर्मा निर्देशित फिल्म ‘जय भोले’ को अफिसियल पोस्टर सार्वजनिक भएको छ । यसअघि यो फिल्म ‘छक्का पञ्जा ३’ सँग भिड्ने खबरले सिनेवृत तरंगीत बनेको थियो ।
आपसी समझदारी अनुसार ‘छक्का पञ्जा ३’ घटस्थापना र ‘जय भोले’ फूलपातीमा आउन तयार भएका हुन् । निर्देशक शर्माले अब फिल्मको प्रचारलाई तिव्र बनाउने बताए । पोस्टरमा फिल्मका अधिकांश कलाकार प्रस्तुत छन् ।
.jpg)
यस फिल्मको कथा अभिनेता खगेन्द्र लामिछानेले लेखेका हुन् । फिल्ममा उनी प्रमुख भूमिकामा छन् । स्वस्तिमा खड्का, सौगात मल्ल, सलोन बस्नेत, बुद्धि तामाङ, राजाराम पौडेल, बसुन्धारा भुषाललगायतका कलाकारहरुको पनि अभिनय छ ।
ह्युमर तथा सोसल कमेडी ड्रामामा निर्मित ‘जय भोले’ को बजेट १ करोड ६० लाख बताइएको छ । निर्देशक शर्माको फिल्ममा निर्माण र अभिनय पनि छ । किरन शर्मा, कृति शर्मा र अंकित शर्माको निर्माण रहेको फिल्मको 'उम्लियो भने पोखिन्छ' गीत हिट भइसकेको छ ।
झापा र ईलाममा खिचिएको ‘जय भोले’ मा पुरुषोत्तम प्रधानको छायांकन, राजनराज सिवाकोटी/कल्याण सिंहको संगीत, राज ढुंगानाको सम्पादन, बसन्त श्रेष्ठको नृत्य र रोशनविक्रम भट्टराईको एक्सन रहेको छ ।
