क्राइम-थ्रीलर जनराको फिल्म ‘रोज’ बक्सअफिसमा असफल भएपछि अभिनेता प्रदीप खड्कालाई ठूलो झट्का लागेको छ । सुपरस्टारको दौडमा रहेका उनलाई उक्त फिल्मको नतिजाले अब स्क्रिप्ट छनौटमा चनाखो हुनुपर्ने देखिन्छ । असफलताको पीडा भुल्दै अब उनले नयाँ फिल्म ‘लभ स्टेशन’ को सुटिङ ज्वाइन गर्दैछन् ।
 (6).jpeg)
उक्त फिल्मको सोमबार पशुपति मन्दिरमा मुहूर्त गरिएको छ । यो फिल्ममा उनको जोडी 'लिलिबिली' गर्ल जसिता गुरुङसँग बाँधिएको छ । यो कपल अहिले प्रेममा रहेको चर्चा छ । शुक्रबारबाट फ्लोरमा निस्कने फिल्मको 'क्यामेरा अन' भारतको दार्जिलिङमा हुनेछ ।
 (2).jpeg)
यसका लागि जम्बो टिम मंगलवार त्यसतर्फ प्रस्थान गर्ने निर्माता गोविन्द शाहीले बताए । प्रदीप र जसिता भने बुधवारमात्र जानेछन् । भेट्रोन निर्देशक उज्वल घिमिरेले निर्देशन गर्ने फिल्मको छायांकन भारतको दार्जीलिङ, कालिङपोङ, सिक्किमलगायत नेपालको पुर्वी भेगका इलाम, फिक्कलमा हुनेछ ।
 (5).jpeg)
५० दिनको छायांकन तालिका रहेको फिल्ममा प्रदीप र जसितासँगै श्रद्धा क्षेत्री, निरुता सिंह, सरोज खनाललगायतका कलाकारहरुको अभिनय रहनेछ । पारिवारिक प्रेमकथामा आधारित रहेकाले विगतका फिल्मभन्दा केही पृथक 'लभ स्टेशन' बन्ने प्रदीपले बताए ।
 (1).jpeg)
गएको वर्ष प्रदर्शनमा आएको फिल्म 'लिलिबिली' मा प्रदीप र जसिताको जोडिलाई दर्शकले अत्याधिक रुचाएका थिए । आलोक शुक्लाको छायांकन रहने फिल्ममा शम्भुजित बाँस्कोटा, दीपक शर्मा, राजनराज शिवाकोटी र एलिश कार्कीको संगीत रहनेछ ।
