आँप जोडी अर्थात् अभिनेता पल शाह र अभिनेत्री आँचल शर्माको अफेयरको खबरले मिडियामा विशेष स्थान पाउन थालेको लामै समय भइसकेको छ । 'नाईं नभन्नू ल ४' बाट सुरु भएको यो कपलको प्रेम चर्चा अझै पनि उस्तै छ ।
 (1).jpg)
लगातार फिल्म र भिडियो सँगै गर्नु, जहाँ पुग्दा पनि एकअर्काको साथ नछुट्नुले पनि अफेयरको कुरालाई थप मलजल गरिरहेको छ । तर, उनीहरु पटक-पटक 'साथीभन्दा माथी' नभएको बताउँदै आएका छन् ।
यो जोडी अभिनीत पछिल्लो फिल्म 'शत्रु गते' बक्सअफिसमा सुपरहिट साबित भएको थियो । अहिले दुबै कुनै पनि फिल्ममा व्यस्त छैनन् । फेरि एकपटक दर्शकको फेभरेट जोडीलाई पर्दामा दोहोर्याउन केही निर्माता/निर्देशक लागीपरेको खबर छ ।
शनिबार दिउँसो अभिनेत्री आँचल, चर्चित लेखक सुविन भट्टराईको नयाँ पुस्तक 'प्रिय सुफी' को विमोचन गर्न नेपाल प्रज्ञा–प्रतिष्ठान पुगेकी थिइन् । लेखक भट्टराईको निमन्त्रणा स्विकार गर्दै उनी विमोचन समारोहको अतिथी बनेकी थिइन् ।
उनले 'समर लभ' आफ्नो मनपर्ने पुस्तक रहेको बताउँदै लेखक भट्टराईलाई नयाँ पुस्तकका लागि शुभकामना दिइन् । 'प्रिय सुफी' को एक हरफ उद्घोषिका सबिना कार्कीले पढेपछि उनले अभिनेत्री शर्मालाई सोधिन्, 'यो कसलाई डेडिकेट गर्न चाहनुहुन्छ ?'
'मेरो बुबालाई', आँचलले झट्टै जवाफ दिइन् । पुस्तक विमोचन कार्यक्रममा उपस्थित सयौं पाठकको एक भीडबाट प्रश्न आयो, 'दोस्रो व्यक्ति ?' उनी मज्जाले हाँसिन् । उनले पल शाहको नाम लिन समय लिइनन् । किन पल नै ? सबिनाले प्रश्न गरिन् ।
उनले शब्दमा फूलबुट्टा भर्दै जवाफ फर्काइन्, 'पहिला मेरो स्कूलका साथीहरु हुनुहुन्थ्यो, उहाँहरुले पनि धेरै सहयोग गर्नुभएको छ । तर, इन्डष्ट्रीमा एक अपरिचित व्यक्ति स्थापित हुने क्रममा मैले विना स्वार्थको साथीको रुपमा पलजीलाई चिनेको हुँ ।'
 (2).jpg)
सबिनाले पलका लागि एउटा सन्देश छाड्न आग्रह गरेपछि आँचल अक्कनवक्क भइन् । उनले आफू यसका लागि तयारी नै नगरेको भन्दै तर्किन खोजिन् । तर, जवाफ नदिई उनले सुख पाइनन् । उनले आफूहरु विना स्वार्थको साथी भन्दै भनिन्, 'हामी सधैं मिल्ने साथी भएर रहिरहन पाऔं ।'
तश्बिर : अर्गेलो थापा
