बलिउडमा एक्टर र एक्ट्रेसलाई बाराबरीको दर्जा दिने चर्चा भइरहेको छ । तर, हालै अभिनेत्री काजोलको एक बयानले सबैलाई चकित बनाएको छ । उनको सोचाई निकै अलग छ ।
फिल्म 'हेलीकप्टर एला' को प्रमोशनमा व्यस्त उनले कुनै अभिनेत्रीको फिल्मले सलमान खानको फिल्म जसरी ५ सय करोड कमाउन नसक्ने बताएकी छन् । 
हिन्दी फिल्म इन्डस्ट्रीमा पुरुष र महिला कलाकारको बीचमा रहेको आकाश-जमिनको असमानतालाई लिएर बहस चलिरहेको छ र केही समययता धेरै अभिनेत्रीले यसको विरुद्धमा आवाज पनि उठाइरहेका छन् ।
यो मुद्धामा काजोल भन्छिन्, 'मलाई लाग्छ कि बक्सअफिस संग्रहसँग यो मुद्धा निकै हदसम्म ठूलो हो र यसमा लिंग निश्चित रुपमा मुद्धा हो । तर अभिनेत्रीको फिल्मले ५ सय करोडको कमाई गर्न सक्दैन, जसरी सलमानका फिल्मले गर्छन् ।'
'अभिनेत्रीहरु फिल्मको सफलताको अभिन्न हिस्सा भएपनि यो एक व्यवसाय हो', उनले भनिन् । उनले आजकाल दर्शकले महिला उन्मुख फिल्मलाई स्वीकार गर्न थालेकोमा खुसी व्यक्त गरिन् ।
उनी अभिनीत नयाँ फिल्म 'हेलीकप्टर एला' १२ अक्टोबरमा रिलिज हुँदैछ । फिल्मलाई प्रदीप सरकारले निर्देशन गरेका हुन् । काजोलले यसमा एक कन्ट्रोलिङ र पोजेसिभ आमाको भूमिका निभाएकी छन् ।
फिल्म एक महत्वाकांक्षी गायिकाको कहानी हो, जसले बच्चाका लागि आफ्नो सपना बाजी लगाउँछिन् । राष्ट्रीय पुरस्कार विजेता अभिनेता रिद्धि सेनले काजोलको छोराको भूमिका निभाएका छन् ।
