यशराज ब्यानरको हिट फ्रेन्चाइजी 'धूम' को तेस्रो पार्ट रिलिज भएसँगै ‘धूम ४’ लाई लिएर चर्चा सुरु भएको थियो । हरेक दिन यो फिल्मको स्टारकास्टलाई लिएर विभिन्न खबर मिडियामा आइरहेको छ तर अहिलेसम्म फिल्मसँग जोडिएको कुनै आधिकारिक जानकारी आएको छैन ।
एकपटक फेरि ‘धूम ४’ सँग जोडिएको एक ठूलो खबर बाहिर आएको छ । खबरअनुसार, यशराज फिल्म्स चाँडै फिल्मको स्टारकास्टको घोषणा गर्ने तयारीमा छ ।
फिल्मफेयरको खबरलाई आधार मान्ने हो भने आमिताभ बच्चन र आमिर खान स्टारर फिल्म 'ठग्स अफ हिन्दोस्तान' को फर्स्ट लुक रिलिज गरेपछि यशराज फिल्म्सले ‘धूम ४’ को स्टारकास्टलाई लिएर ठूलो खुलासा गर्दैछ ।
यो फिल्ममा नेगेटिभ रोलमा सलमान खान नभएर शाहरुख खान देखिन सक्ने बताइएको छ । अहिले शाहरुख 'जीरो' को छायांकनमा व्यस्त छन् । यो फिल्मपछि शाहरुखसँग हाल कुनै बिग प्रोजेक्ट छैन ।
केही दिन अगाडि उनले राकेश शर्माको बायोपिक छाडेको खबर बाहिर आएको थियो । 'जीरो' पछि शाहरुख ‘धूम ४’ को सेट ज्वाइन गर्नसक्ने चर्चा छ । 'धूम' फ्रेन्चाइजीको पछिल्लो तीन फिल्म बक्सअफिमा सुपरहित साबित भएको थियो ।
फिल्ममा सेन्ट्रल क्यारेक्टर चोरको हुने गर्दछ, फिल्मको पूरा कहानी नै चोरको वरिपरि घुम्ने गरेको छ । 'धूम' सिरिजको पछिल्लो फिल्ममा यो भूमिका जोन अब्राहम, ऋतिक रोशन र आमिर खानले निभाएका थिए ।
