चर्चित गायक शिव परियार दुर्घटनामा परेका छन् । सामाखुशी बसुन्धारमा रहेको हुन्डाई सर्भिस सेन्टरमा आफ्नो कार हेर्न जाने क्रममा बा ८० प ९९९८ नम्बरको बाइकमा सवार उनलाई अनियन्त्रित गतिमा गलत रुट प्रयोग गरि पछाडिबाट आएको बा ७८ प ८५११ नम्बरको एफ.जेड बाइकले ठक्कर दिएको थियो ।

दाहिने खुट्टामा गहिरो चोट लागेपछि अहिले उनको ग्राण्डी अस्पतालमा उपचार भैरहेको छ । यस्तै, उनको बाइकमा सवार गायक कर्णराज गिरी भने सामान्य उपचारपश्चात् घर फिर्ने तयारीमा रहेको शिवले आफ्नो आधिकारिक फेसबुकमार्फत् जानकारी दिएका छन् ।

शिवले आफू पनि अहिले खतरा मुक्त रहेको लेखेका छन् । उनी केही दिनमा नै घर फर्किन सक्ने अस्पतालबाट खबर प्राप्त छ । सयबढी आधुनिक गीतमा आफ्नो आवाज भरिसकेका गायक परियारले नेपाली फिल्मका गीतहरु पनि उतिक्कै गाएका छन् ।