बलिउड सुपरस्टार सलमान खानको नयाँ फिल्म ‘रेस ३’ को धमाकेदार ट्रेलर सार्वजनिक भएको छ । एकपछि अर्को नयाँ पोष्टरले फिल्मप्रति दर्शकको उत्सुकता बढ्दै गर्दा निर्माण टिमले मंगलवार मुम्बईमा एक कार्यक्रम गर्दै एक्सनले भरिएको ट्रेलर सार्वजनिक गरेको हो ।
१५ जूनलाई प्रदर्शन मिति तय गरिएको रेमो डिसूजा निर्देशित यो फिल्ममा सलमानसँगै ज्याकलीन फर्नान्डिज, बबी देओल, अनिल कपूर, डेजी शाहलाई एक्सन अवतारमा देख्न सकिन्छ । रमेश तौरानी निर्मित यस फिल्मको ट्रेलरमा ज्याकलीन र डेजी निकै बोल्ड लुक्समा देखिएका छन् ।
सलमानले आजसम्म फिल्ममा भिलेनको भूमिका निर्वाहा नगरेका कारण उनले ‘रेस ३’ मा नेगेटिभ रोल चयन गरेका हुन् । उक्त फिल्ममा उनको रोल पूरै नेगेटिभ भने छैन । उनी ‘रेस ३’ मा साइकोलोजिकल भिलेनको भूमिकामा देखिँदैछन् ।
स्मरण रहोस्, सलमानको गएको २२ डिसेम्बरमा फिल्म ‘टाइगर जिन्दा हे’ प्रदर्शनमा आएको थियो । भारतीय बक्सअफिसमा ३ सय करोडभन्दा बढी कलेक्सन गरेको यो फिल्मका कारण ‘रेस ३’ लाई ठूलो फाइदा पुग्ने धेरैको अनुमान छ । सलमानका प्रशंसक फेरि पनि उनको एक्सन अवतार हेर्न व्यग्र प्रतिक्षामा छन् ।
खबरअनुसार, यस फिल्मले प्रदर्शन अगावै १९० करोडको कमाई गरेको छ । मिडियाको खबरलाई आधार मान्ने हो भने ‘रेस ३’ का प्रोड्यूसर रमेश तौरानीले यस फिल्मको थिएट्रिकल राइट्स इरोज इन्टरनेशनललाई १९० करोडमा बेचेका छन् । यो सलमानको पहिलो फिल्म हो जसको थिएट्रिकल राइट्स सबैभन्दा महँगो मूल्यमा विक्रि भएको छ ।
ट्रेलर हेर्नुस् :-
