विश्व चर्चित म्याडम तुसाद संग्रहालयमा मैनको प्रतिमा हुनुलाई ठूलो प्रतिष्ठाका रुपमा लिइन्छ । अब चाँडै उक्त म्यूजियममा सुपरस्टार महेश बाबूको मैनको मूर्ति राखिने भएको छ ।
सोसल मिडियामा आफ्ना फ्यानलाई खुसीको खबर शेयर गर्दै महेश बाबूले प्रतिष्ठित म्याडम तुसादको हिस्सा बन्न पाएर खुसी महशुस गरेको लेखेका छन् ।
विश्वभरमा उनको सुपरस्टारडमलाई मध्येनजर गर्दै म्याडम तुसाद महेश बाबूको मुर्ति बनाउँदैछ, जुन उनको कुनै पनि प्रतिष्ठित भूमिकामा आधारित हुने छैन । उनी अभिनीत नयाँ फिल्म 'भारत अने नेनु' ले अहिले संसारभरमा सानदार कलेक्सन गरिरहेको छ ।
सन् १९७५ अगष्ट ९ मा चेन्नई, तमिलनाडुमा जन्मिएका उनको फिल्मी सफर बाल्यकालदेखि नै सुरु भएको थियो । तर, उनलाई २००३ मा आएको 'ओकाडू' बाट सफलता मिल्यो, जसमा उनले कबड्डी प्लेयरको भूमिका निर्वाहा गरेका थिए ।
यो फिल्मको सफलतापछि उनले आफ्नो करिअर कहिल्यै पछाडि फर्किएर हेर्नु परेन । बरिष्ठ तेलगु अभिनेता कृष्णाका छोरा महेशले सन् १९७९ मा आएको फिल्म 'नीदा' मा एक बाल कलाकारको भूमिका निर्वाहा गरेका थिए । यसपछि उनको ८ फिल्म आयो, जसमा उनले बाल कलाकारकै रुपमा काम गरे ।
सन् १९९९ मा 'राजकुमरुदु' बाट उनले पहिलो पटक मुख्य अभिनेताको रुपमा अभिनय गरेका थिए, जसका लागि उनले सर्वश्रेष्ट अभिनेताको पुरस्कार हात पारे ।
महेश बाबुले 'मुरारी', 'ओकाडू', 'अथाडू', 'पोकिरी', 'नेनोक्कडीने', 'श्रीमंथुडु', 'दूकुदु', 'व्यापारी', 'सीतम्मा वकितलो सिरिमले चेत्तु' जस्ता दर्जनौं फिल्ममा काम गरेका छन् ।
