गएको वर्ष 'किस्मत २' लिएर आएकी अभिनेत्री शिल्पा पोख्रेलको रिलिजको दिन कुरेर बसेको नयाँ फिल्म हो 'मंगलम' । निर्माता छविराज ओझाको ब्यानरमा भित्रिएपछि सफलताको मात्र छडी समातेर अगाडि बढिरहेकी शिल्पाले यो फिल्मबाट पनि ठूलो आश बोकेकी छिन् ।
चर्चामा रहेको 'पर्ख पर्ख मायालु' बोलको गीतका कारण पनि 'मंगलम' बक्स अफिसमा हिट हुने धेरैको अनुमान छ । यस्तैमा प्रचार-प्रसारलाई आक्रामक बनाउन फिल्मको टिम मोफसल यात्रामा निस्केको छ ।
निर्माता छविराज ओझा, निर्देशक नवल नेपाल, अभिनेत्री शिल्पा पोख्रेल, नायक पुष्प खड्का लगायतको युनिटले पूर्वको धरानबाट प्रचारलाई तिब्रता दिएको हो ।
फिल्म युनिट धरानबाट इटहरी, दमक, बिर्तामोड, चितवन, हेटौँडा हुँदै पोखरा पुग्ने छ । नवल नेपाल निर्देशित फिल्मले पारिवारिक प्रेम कथालाई बोलेको छ ।
फागुन २५ गतेबाट देशव्यापी प्रदर्शनमा आउन लागेको यो फिल्ममा शिल्पा, पुष्पसँगै नायक पृथ्वीराज प्रसाईँ, नीर शाह, मिथिला शर्मा मुख्य भूमिकामा छन् भने, नायिका साम्राज्ञी राज्यलक्ष्मी शाह केमियो भूमिकामा छिन् ।
‘मंगलम’ मा विष्णु घिमिरेको छायांकन, दिपक शर्माको संगीत, गोविन्द फुँयालको कथा रहेको छ । फिल्मको निर्मातामा दिजेन्द्र शाक्य, साकार ओझा र ओम गुरुङ रहेका छन् ।