यस वर्षको सुपरहिट फिल्म 'ए मेरो हजुर २' बाट भित्रिएका चकलेटी हिरो हुन् सलिनमान बनियाँ । फिल्ममा आउनु अगावै उनले राम्रो फ्यान फलोइंग बनाएका थिए । हेयर स्टाइल र क्यूट लुक्सले युवतीहरुलाई 'घायल' बनाएका सलिनमानले फेरि पर्दामा फर्किने सोच बनाएका छन् ।
डेब्यू फिल्म रिलिजपछि गुमनाम जस्तै भएका उनी अहिले आफ्नो पिताको व्यवसायमा व्यस्त रहेको बताउँछन् । बिहीवार दुवै मृगौलामा समस्या आएपछि राजधानीको महाराजगञ्जस्थित त्रिभुवन विश्वविद्यालय शिक्षण अस्पतालमा उपचाररत गायिका जलजला परियारलाई सहयोग गर्न पुगेका सलिनले अब चाँडै नयाँ फिल्म गर्ने बताए ।
सञ्चारकर्मीको प्रश्नको उत्तर दिँदै उनले भने, 'म ग्याप गर्ने सोचमा थिइनँ । तर, विभिन्न कारणले यस्तो हुन गएको हो । धेरै प्रोजेक्टबाट अफर आए पनि अहिलेसम्म मलाई मन पर्ने स्क्रिप्ट आएको छैन । राम्रो स्क्रिप्ट आएको खण्डमा फिल्म गर्ने सोचमा छु ।'
'ए मेरो हजुर २' रिलिज पछि लाखौं पैसा ‘सुटकेस’ मा बोकेर दर्जनौं निर्माताहरु उनको घरसम्म पुगिसकेका छन् । तर, उनले हालसम्म कुनै पनि 'न्यू प्रोजेक्ट' मा हात हालेका छैनन् ।
धेरैको विश्वास छ, नायिका झरना थापाले आफ्नो दुई नयाँ प्रोजेक्ट 'ए मेरो हजुर ३' र 'भागवत गीता' मध्ये एकमा फेरि सलिनलाई दर्शकमाझ ल्याउनेछिन् ।
यस विषयमा झरनाका श्रीमान तथा निर्माता सुनिल कुमार थापाले भने, 'सलिन घरकै हिरो हो । मैले केही दिन अगाडि पनि अब फिल्म गर भनेर भनेको थिएँ । अहिलेसम्म उसले हाम्रो फिल्म गर्ने वा नगर्ने भन्ने टुंगो लागेको छैन । हामीले अफर भने गरेका छौं ।'
सलिनले झरना थापाको नयाँ फिल्ममा काम गर्ने वा नगर्ने भन्ने विषयमा बोल्न चाहेनन् । उनको यतिबेला लभ लाइफको पनि उतिक्कै चर्चा छ । केही दिन अगाडि उनले आफ्नी प्रेमिका अस्प्रिना जिन्हा श्रेष्ठसँग बर्थडे मनाएको तश्बिर सामाजिक सञ्जालमा भाइरल भएको छ ।