पछिल्लो समय गीतसंगीतका कारण पनि नेपाली फिल्मको व्यापार केही आशलाग्दो बन्दै गएको छ । गीतसंगीत उत्कृष्ट भएकै कारण धेरै फिल्मले बिजनेशमा बाजी मारेको रेकर्ड फिल्म क्षेत्रमा छ । 'नाई नभन्नु ल' का संस्करणदेखि 'छक्का पन्जा २' सम्म पछिल्ला उदाहरण हुन् ।
यस्तै, फागुन ११ गतेबाट देशव्यापी प्रदर्शनमा आउन लागेको फिल्म ‘पञ्चेबाजा’ को ‘घिन घिन मादल’ बोलको गीत पनि यतिबेला खुब चर्चामा छ । चिया पसलदेखि विभिन्न साँस्कृतिक कार्यक्रममा अहिले यो गीत राम्रै घन्किरहेको छ ।
युट्युबमा २१ लाख भन्दा बढी 'भ्यूज' मिलेको गीतलाई झन्डैै ६ सयको आसपासमा कमेन्ट मिलेको छ । कमेन्टमा अधिकांशले गीतको तारिफ गरेका छन् । ‘पञ्चेबाजा’ को व्यापारिक सफलताको लागि यो गीतले ठूलो अर्थ राख्ने देखिएको छ ।
अञ्जु पन्त र डेविड शंकरको स्वर रहेको गीतमा प्रदीप भाद्वाजको शब्द र विकास चौधरीको संगीत सुन्न सकिन्छ । कविराज गहतराज गीतका कोरियोग्राफर हुन् । गीतको भिडियोमा सौगात र जस्मिन श्रेष्ठ फिचरिङ छन् ।
यस्तैमा फिल्मले सेन्सर बोर्डबाट 'पिजी सर्टिफिकेट' पाएको छ । अब यो फिल्म हेर्न १६ वर्षभन्दा कम उमेरका दर्शकले अभिभावकको साथमा हेर्नु पर्नेछ । न्यू भेनस फिल्मस्को व्यानरमा निर्माण भएको ‘पञ्चेबाजा’ मा राजेश शाहीको लगानी छ ।
फिल्ममा सौगात र जस्मिनसँगै कर्मा, बुद्धि तामाङ, सिर्जना सुब्बा, प्रकाश घिमिरे, सबिन बास्तोला, प्रमिला तुलाचन, देशभक्त खनाल, युवराज भण्डारी, तेज गिरी र राजेश शाहीको पनि अभिनय छ ।
गीत हेर्नुहोस् :-
सारा गुरुङ सह-निर्माता रहेको फिल्ममा दीर्घ खड्काको सम्पादन, प्रदिप भारद्वाजको लेखन, जेसन कुँवरको पार्श्व ध्वनि, उत्तम न्यौपानेको मिक्सिङ र हरि घले लामाको छायांकन छ । यो फिल्मका निर्देशक घनश्याम लामिछाने हुन् ।