गएको मंसिर २९ गतेलाई प्रदर्शन मिति तोकिएपनि प्रदर्शनमा आउन नसकेको नायिका ऋचा सिंह ठकुरी अभिनीत तथा निर्मित फिल्म ‘सुपर गोर्खे’ को नयाँ रिलिज डेट घोषणा गरिएको छ । अब पोस्टपोन्ड नहुने भन्दै फिल्मलाई वर्ष २०७५ बैशाख ७ गतेबाट देशव्यापी प्रदर्शनमा ल्याइने ऋचाले जानकारी दिइन् ।
उनले प्राविधिक कारणले फिल्म पूर्वनिर्धारित मितिमा प्रदर्शनमा आउन नसकेको पनि बताइन् । यस्तै, उनले अप्रिल ८ तारिखमा अष्ट्रेलियामा पनि ‘सुपर गोर्खे’ लाग्ने जानकारी दिएकी छन् । फिल्मलाई राज थापाले निर्देशन गरेका हुन् ।
अविर हाउस प्रोडक्सन प्रा.लि.को प्रस्तुती रहेको फिल्ममा ऋचा सिंहसँगै सुरज सिंह ठकुरी, निराजन लुईंटेल, भुपेन्द्र क्षेत्री, सचिन केसी, कामना भुजेल, भानुदेव विष्ट, उत्तम विष्ट, विनय दाहाल, सन्तोषी श्रेष्ठ र राज थापाको अभिनय रहेको छ ।
किरण माईकलको लेखन रहेको फिल्मलाई सौरभ लामाले खिचेका हुन् भने द्धन्द्ध निर्देशन चन्द्र पन्तको छ । निर्माताको रुपमा ईश्वरी सिंह ठकुरी, रामकृष्ण र सुदिप जंग थापा रहेका छन् । विवाहपछि ऋचाको यो कमब्याक फिल्म हो ।
