‘मस्ट डिमान्डेड’ एक्टर भएपनि बक्स अफिसमा विक्न छाडेका नायक हुन् दयाहाङ राई । जसरी उनले लगातार फिल्महरु गरिरहेका छन् त्यसरी नै कलेक्सनको मामलामा उनी कमजोर साबित भइरहेका छन् । यस वर्ष प्रदर्शनमा आएका फिल्महरु मध्ये ‘मिस्टर झोले’ ले मात्र उनलाई राहतको सास फेर्न दियो । अन्य फिल्म त हलमा लागेको र उत्रिएको समेत पत्तो भएन ।
अब उनलाई सबैभन्दा ठूलो आश फिल्म ‘कान्छी’ माथि छ । दुई गीत र ट्रेलरले बनाएको हाइप हेर्दा लाग्छ यो फिल्मले बक्स अफिसमा राम्रै पैसाको भेला बगाउनेछ । तर, पछिल्लो समय दयाहाङको बाटोमा दुई युवा स्टार अनमोल केसी र प्रदीप खड्का तगारो बनिरहेका छन् ।
‘कान्छी’ ले सुरुमा घोषणा गरेको माघ २६ मा ‘कृ’ भिड्न आयो । ‘कान्छी’ फागुन ४ मा पुग्यो । चैत ३० मा प्रदीपको फिल्म ‘लिलिबिली’ आउँदैछ । यो मितिमा दयाहाङको ‘नेप्टे’ पनि छ । बलिउड फिल्म ‘२.०’ का कारण प्रदीप बैशाख १४ मा पुगेपछि ‘नेप्टे’ चैत ३० मा आएको थियो । अब फेरि ‘लिलिबिली’ पुरानै मितिमा फर्किएको छ अर्थात्, चैत ३० मा ।
लाग्छ, अहिले दयाहाङका लागि अनमोल र प्रदीप बाधक बनिरहेका छन् । कहिले जुध्न अनमोल आउँछन् त कहिले प्रदीप । के अब चैत ३० मा प्रदीपसँग दयाहाङको महासंग्राम होला ? हेर्न बाँकी छ ।
‘दिन दुई गुणा अनि रात चौगुना’ चम्किरहेका अनमोल र प्रदीपको अगाडि दयाहाङको घट्दो लोकप्रियता ‘बालुवामा पानी हाले झैँ’ हुनजान्छ । यसकारण पनि यी दुई युवा स्टारसँग प्रतिस्पर्धा गर्नु भनेको अहिलेको अवस्थामा दयाका सामुन्ने चुनौतीको पहाड खडा हुनु हो ।
