नेपाली चलचित्र प्राविधिक संघको आयोजनामा हुँदै आएको ‘नेफ्टा फिल्म अवार्ड’ को दशौं संस्करण आगामी फागुन ३० गते हुने भएको छ । अध्यक्ष पुष्कर लामाले आफ्नो जन्मदिनमा अवार्ड हुने मिति सार्वजनिक गरे ।
पछिल्लो पाँच बर्षदेखि विदेशमा सम्पन्न भएको अवार्ड यो पटक पनि विदेशी भुमिमा नै हुने भएको छ ।
उत्कृष्ट पाँच घोषणासँगै अवार्ड आयोजना हुने मुलुकको नाम सार्वजनिक गरिने लामाले बताए । आउँदो सातादेखि पाँच सदस्यीय जुरीले फिल्म हेर्न सुरु गर्ने छन् ।
अवार्डको एघारौं संस्करण आगामी दशैं अगाडि नै आयोजना हुने जनाइएको छ । ‘हामी दुबै अवार्डमा जुटिसकेका छौं’ उनले भने, ‘दशौं अवार्डको लोकेसन र विस्तृत पक्ष उत्कृष्ट पाँच घोषणा बेला सार्वजनिक गर्नेछौं ।’
दुई सातापछि सांस्कृतिक प्रस्तुति दिने कलाकारले रिहर्सल थाल्नेछन् । चलचित्र प्राविधिकको छाता संस्थाले यसअघि नेपालसहित मलेसिया, हङकङ, कतार र दुबईमा अवार्ड सम्पन्न गरिसकेको छ ।
