अभिनेता राजेश हमालले एमाले अध्यक्ष केपी शर्मा ओलीलाई बधाई तथा शुभकाना दिएका छन् । शनिबार ओली निवास बालकोट पुगेर हमालले ओलीलाई प्रतिनिधिसभा निर्वाचनमा निर्वाचित भएको र वामगठबन्धनले दुईतिहाई ल्याएकोमा बधाई र प्रधानमन्त्री बन्नका लागि शुभकामना दिएका हुन् ।
अध्यक्षसँगको भेटमा हमालले ओलीको राष्ट्रियताको अडानप्रति आम नेपाली उत्साहित भएको बताए । भेटमा हमालले आगामी सरकारको नेतृत्व गरेर देशलाई स्थिरता, शान्ति र विकासको महायात्रामा अगाडि बढाउन ओलीलाई अग्रिम शुभकामना पनि दिएका छन् ।
यस्तै, हमालसँगको भेटमा ओलीले अभिनेताहरुले फिल्ममा मात्र अभिनय गरेर देश समृद्ध नहुने बताउँदै देश बनाउन महत्वपूर्ण भूमिका निर्वाह गर्न आग्रह गरे । पहिलो चरणको स्थानीय निर्वाचनमा नेकपा एमालेको झन्डा बोक्दै आफ्नो हितैषी मित्रलाई जिताउन गल्लीगल्ली डुलेपछि हमाल एमाले निकट रहेको चर्चा सिनेवृत्तमा 'हट केक' बनेको थियो ।
