नेपाली फिल्मकी सदावहार नायिका जल शाहको आज ‘ह्याप्पी बर्थ डे’ । विकिपीडियाका उल्लेख भएअनुसार, २०३९ साल मंसिर २८ गते काठमाडौंमा जन्मिएकी जल आजबाट ३५ वर्षमा लागेकी छिन् । कुनै बेला नेपाली फिल्मबाट दर्शकको मन जितेकी नायिका जल शाह आजकाल फिल्म क्षेत्रमा छैनन्। फिल्म क्षेत्रमा मात्र होइनन् उनी नेपालमा नै छैनन्।
लामो समयदेखि उनी श्रीमान र एक छोरीसँग अमेरिकामा बस्दै आइरहेकी छिन् । गएको वर्ष दशैं मनाउनका लागि उनी नेपाल आएकी थिइन् । नेपाल बसाईको क्रममा सञ्चारकर्मीहरुसँग कुराकानी गर्दै नायिका शाहले फिल्ममा अभिनयसँगै निर्माणमा फर्किने योजना रहेको बताएकी थिइन् ।
‘आउँदा दिनमा हामी मौलिक नेपाली फिल्म निर्माण गर्ने योजनामा छौं, नेपालका ग्रामीण भेकमा धेरै मौलिक कथा भएकाले नारीप्रधान फिल्म निर्माण गर्ने म र मेरो श्रीमानको योजना छ ।’ अभिनेत्री शाहले भनेकी थिइन्, ‘मेरा समकालीन अभिनेत्रीहरू फिल्म निर्देशनमा लागेर स्थापित हुनुभएकामा मलाई साह्रै खुसी लागेको छ । ममा निर्देशन गर्ने क्षमता नभएकाले म अभिनयसँगै फिल्म निर्माणमा भने आउनेछु ।’
आफ्नी आमाको चाहनाअनुसार यादव खरेलको फिल्म ‘श्री स्वस्थानी’बाट उनी नेपाली रजतपटमा प्रस्तुत भएकी थिइन् । नायिकाका रूपमा उनले आफ्नो फिल्म यात्रा ‘अवतार’ फिल्मबाट सुरु गरेकी थिइन् । त्यसपछि करिब चार दर्जन फिल्ममा अभिनय गरेकी उनका 'पराइ घर', 'शंकर', 'ठूल्दाई', 'नेपाली बाबु', 'एक नम्बरको पाखे', 'नाता रगतको', 'नेपाल प्यारो छ', 'बुहारी' हिट फिल्मको सूचीमा सुचिकृत छन् ।
‘सुप्रसिद्ध नायिका जल शाहलाई फिल्मीखबर डटकमको तर्फबाट जन्मदिनको शुभकामना ।’