फिल्म ‘सन्दिप और पिंकी फरार’का लागि बलिउड स्टार अर्जुन कपूर र परिणिती चोपडा नेपाल आएका छन् । मंगलवारबाट नेपाल र भारतको सीमा क्षेत्र बैतडीको झुलघाटबाट फिल्मको सुटिङ सुरु भएको छ । परिणितीले आफ्नो आधिकारीक इन्स्टाग्राममा एक तश्वीर शेयर गर्दै आफू नेपालमा रहेको जानकारी दिएकी छिन् । न्यानो कपडा लगाएकी परिणितीको नजिकै हिटर बलिरहेको छ ।
अर्जुन कपुर र परिणिति चोपडा अभिनित यो फिल्मको पहिलो सेड्युलको छायांकन नयाँ दिल्लीमा सकिएको छ । भारतीय सञ्चारमाध्यमका अनुसार, फिल्मका निर्माताले सुन्दरता, ग्रामीण परिवेश र पहुँचयोग्य स्थान भएकाले नेपाल र भारतको सीमाना छनौट गरेको बताएका छन् ।
फिल्म बन्ने भएपछि यशराज फिल्मस्ले गत अक्टोबरमा नेपालस्थित सरकारी निकायलाई यो स्थानमा फिल्म छायांकनका लागि अनुमति माग्न पत्र पठाएको थियो ।
नेपाल सरकारले पनि फिल्म युनिटलाई रोमान्टिक प्रेमकथाको फिल्म छायांकन गर्न केही सर्त राखेर अनुमति दिएको थियो । तर, ती सर्तमा के उल्लेख गरिएका थिए त्यो भन्ने खुलाइएकोे छैन ।
अब झण्डै १५ दिनसम्म अर्जुन र परिणिती नेपालको बैतडी जिल्लामा रहनेछन् । फिल्ममा नायिका परिणिति बैंक र फाइनान्समा काम गर्ने एक युवतीको भूमिकामा छिन् भने अर्जुन चाहिँ हरियाणाको एक पुलिसको भूमिकामा देखिँदैछन् ।
फिल्ममा अर्जुन र परिणितीले विवाह गरेपछि नेपाल आएको दृश्य खिचिनेछन् ।
