विवाह गरेपछि नेपाली फिल्मबाट गायब जस्तै भएकी 'नाई नभन्नू ल'की हिट नायिका ऋचासिंह ठकुरीले निर्माण र अभिनय गरेको फिल्म ‘सुपर गोर्खे’ को टीजर सार्वजनिक भएको छ । ऋचाका श्रीमान गजेन्द्रराज थापाले निर्देशन गरेको फिल्मका नायक पनि थापा आफै हुन् । ऋचाको फिल्म प्रोडक्शन हाउसबाट निर्माण भएको ‘सुपर गोर्खे’को १ मिनेट २० सेकेण्ड लामो टीजरमा सुपरम्यान, ब्याटम्यानपछि नेपाली सुपरहिरो सुपर गोर्खेलाई हेर्ने आग्रह गरिएको छ ।
फिल्म ‘सुपर गोर्खे’का निर्माता इश्वरीसिंह ठकुरी, रामकृष्ण (ठुले), सुदिपजङ्ग थापा हुन् भने यसमा ताराप्रकाश लिम्बु र फिलिप जोनको संगीतमा सुदिन पोखरेल, रुपक डोटेल, ताराप्रकाश लिम्बु, रजिना रिमाल र मिलन अमात्यको गायन रहेको छ ।
ऋचासिंह ठकुरी, सुरजसिंह ठकुरी, भुपेन्द्र क्षेत्री, निराजन लुइँटेल, भानु विष्ट, सचिन केसी, उत्तम विष्ट, मनोज राई, कामना भुजेल र राज थापा फिल्मको कलाकारको रुपमा रहेका छन् । किरण माइकलको लेखन रहेको फिल्म ‘सुपर गोर्खे’लाई सौरभ लामाले खिचेका हुन् भने यसका सम्पादक बनिश शाह हुन् ।
फिल्ममा चन्द्र पन्तको एक्शन, कमल राई र रामजी लामिछानेको कोरियोग्राफी तथा सत्यम रानाको भिएफएक्स रहेको छ । एफडी कम्पनीले वितरण गर्ने ‘सुपर गोर्खे’ मंसिर २९ गते देशभरी एकैसाथ प्रदर्शन हुँदैछ ।
