केही वर्ष अगाडि नायिका नीता ढुंगानाको प्रेममा रहँदा खुब चर्चा थियो नायक आमेश भण्डारीको । नीतालाई आवश्यक परेको खण्डमा आफ्नो एक किड्नी समेत दिने बचन दिएका आमेश अहिले एक्लो जीवन विताइरहेका छन् । यी दुई नदीका दुई किनार भएको झण्डै १ वर्ष भैसकेको छ । आमेश र नीताले 'तँ म र ऊ' र 'फूलै फूलको मौसम तिमीलाई' फिल्ममा एकसाथ काम गरेका थिए ।
प्रेमको तिखो काँडा निकालेर आफ्नो फिल्मी करिअर बचाउन दिलोज्यान दिएका आमेश अभिनित तेस्रो फिल्म ‘मेला’ यही कात्तिक २४ गतेबाट देशव्यापी प्रदर्शनमा आउँदैछ । पहिलो र दोस्रो फिल्म फ्लप भएपछि अहिले आमेश ‘मेला’बाट आशावादी छन् । उनका लागि यो फिल्म हिट हुन अत्यन्त आवश्यक छ । पहिलो र दोस्रो फिल्मले दिएको फ्लप हिरोको छाप उनलाई ‘मेला’बाट मेटाउनु छ । तर, फिल्मको सुस्त प्रचार-प्रसारले आमेशलाई राम्रै तनाब दिएको छ ।
फिल्ममा आमेशका अलावा सलोन बस्नेत, अशिष्मा नकर्मी लगायतका कलाकारले अभिनय गरेका छन् । आमेशलाई मात्र होइन यो फिल्म नायिका अशिष्माका लागि पनि हिट हुन जरुरी छ । यसअघि उनी अभिनीत 'संरक्षण', 'राधे', 'अर्धकट्टी', 'तोरी लाहुरे' लगायतका फिल्म फ्लप जो भइसकेका छन् । नायक सलोन भने 'ए मेरो हजुर २' को सफलतापछि गमक्क छन् ।
राज राधिका इन्टरटेन्मेन्टको प्रस्तुतीमा तयार भएको फिल्म ‘मेला’ लाई बसन्त निरौलाले निर्देशन गरेका हुन् । फिल्ममा अष्ट महर्जनको द्धन्द्ध र हरी पन्तको स्टोरी, स्क्रिन प्ले र डाइलग रहेको छ । हरि पन्त प्रस्तुतकर्ता रहेको यो फिल्मका निर्माता मनोज के मरोडिया हुन् ।
