अभिनेत्री दिशा पटानी तमिल ऐतिहासिक ड्रामा फिल्म 'संघमित्रा'मा मुख्य भूमिका देखिने भएकी छिन् । भारतीय मिडियाका अनुसार, दिशाले श्रुति हसनलाई रिप्लेस गर्दै फिल्म साइन गरेकी हुन् । फिल्मसँग जोडिएका एक व्यक्तिले भने, 'दिशाले फिल्म साइन गरिसकेकी छिन् । निर्माताले यसको चाँडै घोषणा गर्दैछन् । यो भूमिका उनको जीवनभरका लागि यादगार हुनेछ ।'
फिल्मको निर्देशन सुन्दर सीले गर्दैछन् र यसको निर्माण श्री थेनान्डल फिल्म्स कम्पनीले गर्दैछ । यो फिल्म तेलुगू र हिन्दीमा रिलिज हुनेछ । सुत्रले भन्यो, 'यो तमिलसँगै तेलुगूमा पनि निर्माण गरिनेछ तर हिन्दी संस्करणमा भने पूरै नयाँ कलाकार हुनेछन् ।' फिल्ममा जयम रवि र आर्या पनि मुख्य भूमिकामा देखिँदैछन् । यसमा ए.आर. रहमानले संगीत दिनेछन् । यो फिल्मको बजेट १५० करोड बताइएको छ ।
