प्रायः सधैजसो फिल्मको प्रदर्शन मितिलाई लिएर नेपाली सिनेवृतमा राम्रै चर्चा हुने गर्छ । कहिले एकै मितिमा ठूला फिल्मको भिडन्तलाई लिएर होस् वा आफूलाई कमजोर ठान्दै निर्माताले फिल्मको प्रदर्शन मिति पोष्टपोन्ड गरेका खबरहरु नै किन नहोस् मिडियामा सधै चर्चाको विषय बन्ने गर्छ । हालैमा असोज ११ गते 'छक्का पन्जा २' लाई छोड्दै फिल्म 'मंगलम'ले फागुन ४ गते लक गरेको खबर सेलाउन नपाउँदै फेरि अर्को फिल्मले आफ्नो पूर्व निर्धारित प्रदर्शन मितिबाट पछाडि हटेको छ ।
भाद्र ८ पछि कात्तिक १७ गतेलाई रिलिज कन्फर्म गरिएको फिल्म 'झ्यानाकुटी'को प्रदर्शन मिति फेरि पोष्टपोन्ड भएको छ । अब यो फिल्म मंसिर १ गतेबाट देशव्यापी प्रदर्शनमा आउने वितरक सुनिल मानन्धरले जानकारी दिए । कात्तिक १७ गते निशा अधिकारी अभिनित नयाँ फिल्म 'रोमियो' प्रदर्शनमा आउने भएपछि 'झ्यानाकुटी'को प्रदर्शन मिति सारिएको हो । फिल्म' झ्यानाकुटी'लाई नायिका निशा अधिकारीले पहिलो पटक निर्माण गरेकी हुन् ।
सिमोस सुनवारले निर्देशन गरेको यो फिल्ममा नायक सौगात मल्ल र नायिका वेनिशा हमालको मुख्य भूमिका छ । नीशा अधिकारी र सिमोस सुनवार मिलेर यो फिल्म निर्माण गरेका हुन् ।
