कात्तिक १७ गते प्रदर्शनमा आउन लागेको फिल्म 'फाटेको जुत्ता'को 'आई एम सरी...' बोलको पहिलो गीतलाई अहिले दर्शकहरुले निकै रुचाएका छन् । युट्युबमा सार्वजनिक गरिएको तीन दिनमा गीतलाई ६ लाख ८० हजार बढी 'भ्यू' मिलेको छ । गीतले दर्शकहरुबाट सकारात्मक प्रतिक्रिया पाएको भन्दै निर्माता अर्जुन कुमारले खुशी व्यक्त गरे । उनले भने, 'गीतले दर्शकहरुबाट पाएको प्रतिक्रियाले उत्साहित छु । गीतलाई १२ सयभन्दा बढी कमेन्ट मिलेको छ र सबैले गीतको तारिफ गर्नुभएको छ । गीतले पाएको सफलताले फिल्मलाई पनि ठूलो सहयोग पुगेको छ ।'
सौगात मल्ल र प्रियंका कार्की फिचरिङ गीतमा प्रवेश मल्लिकको स्वर, शब्द र संगीत छ । निरज कँडेलले खिचेको गीतमा राजीव समरको कोरियोग्राफी रहेको छ । गीतमा सौगात मल्ललाई बलीउड स्टार सलमान खानको शैलीमा उतारिएको छ । अर्जुन कुमार फिल्मसको व्यानरमा तयार भएको 'फाटेको जुत्ता'लाई अर्जुन कुमारले निर्माण गरेका हुन् ।
फिल्ममा प्रियंका र सौगातका अलावा वुद्धि तामाङ, कामेश्वर चौरासिया, रविन्द्र झा, अनोज पाण्डे लगायतका कलाकारको अभिनय छ । 'फाटेको जुत्ता'मा अष्ट महर्जनको एक्सन, दिर्घ खड्काको सम्पादन र निरोज महर्जनको लेखन छ । कमेडी जनराको यस फिल्ममा निकेश खड्काको निर्देशन छ ।
गीत हेर्नुस् :-
