भाद्र १६ गतेबाट प्रदर्शनमा आउँदैछ फिल्म 'ए मेरो हजुर २' । झण्डै डेढ दशक अगाडि प्रदर्शनमा आएको झरना थापा र स्वर्गीय नायक श्रीकृष्ण श्रेष्ठको अभिनय रहेको सुपरहिट फिल्म 'ए मेरो हजुर'को नेम सिक्वेल 'ए मेरो हजुर २' बाट झरनाले पहिलो पटक निर्देशनमा हात हालेकी छन् । ४ वर्ष अगाडि हङ्गकङ्गमा सम्पन्न नेफ्टा अवार्डमा 'ए मेरो हजुर २' फिल्मको घोषणा गरिएको थियो । तर, विभिन्न कारणले फिल्मको छायाँकन ३ वर्षपछि सुरु भयो । 

 

गएको वर्ष फिल्मको छायाँकन सकिएको हो । फिल्मको छायाँकन ढिलो हुनुको कारण कलाकार फाइनल नहुनु नै थियो । नायिका तथा निर्देशक झरना थापा र निर्माता सुनिल कुमार थापाले फिल्मका लागि थुप्रै नयाँ तथा पुराना अनुहारहरु हेरेका थिए तर धेरै पटकको भेटपछि नायिकामा साम्राज्ञी राज्यलक्ष्मी शाह फाइनल भईन् । 'ड्रिम्स'बाट लोकप्रियता कमाएकी साम्राज्ञीलाई 'ए मेरो हजुर २' मा साइन गराउन निर्माण पक्षलाई कम्ता गाह्रो थिएन । महँगो पारिश्रमिकमा साम्राज्ञीले 'ए मेरो हजुर २' साइन गरेको चर्चा छ । 

 

साम्राज्ञी नायिकामा फाइनल भएपनि नायकको टंगो लगाउन फेरि निर्माण पक्षको पसिना छुट्यो । झरनाले दर्जन बढी युवाको फोटो ल्याएर साम्राज्ञीलाई देखाइन् तर उनले कसैलाई पनि 'ओके' भनिनन् । निर्माण पक्षलाई तोकिएको मितिमा छायाँकनमा जान नसक्नुको पीडा त थियो नै अझ साम्राज्ञीले आफूलाई सुहाउने जोडी फाइनल नगर्दा झरनाको भोकनिन्द्रा हराएको थियो ।

 

यस्तैमा झरनाको हातमा पर्‍यो एक चकलेटी केटाको फोटो । उनी थिए सलिनमान बाँनिया । सलिनको फोटो आफ्नो हातमा पर्न साथ झरनाले लगभग फाइनल गरिसकेकी थिइन् तर साम्राज्ञीले के गर्लिन् भन्ने डर पनि उनलाई उतिक्कै थियो । 

 

झरनाले सलिनको फोटो साम्राज्ञीलाई देखाइन् । फोटोभन्दा अगाडि नै साम्राज्ञीले सलिनलाई रियलमै एक फेसन विकमा देखिसकेकी रहेछिन् । साम्राज्ञीले एकैसासमा सलिनलाई आफ्नो जोडीको रुपमा स्वीकार गरिन् । साम्राज्ञी र झरनाको रोजाईलाई अहिले सबैले मन पराएका छन् । सलिनमान बाँनिया पहिलो फिल्म रिलिज नहुँदै चर्चामा छन् । गीतसंगीत र ट्रेलरमा साम्राज्ञी र सलिनको जोडीलाई दर्शकहरुले खुबै रुचाएका छन् ।