गएको वर्ष प्रदर्शनमा आएको सुपरहिट फिल्म ‘छक्का पन्जा’ले विभिन्न रेकर्ड बनायो । सिनेमा हलमा सय दिनको सुखीयाली साट्दै गर्दा फिल्मले १७ करोड ग्रस विजनेश गरेको थियो । यो नेपाली फिल्म इतिहासमा नै पहिलो हो । फिल्मले व्यापारमा मात्र रेकर्ड बनाएन गीतसंगीतले पनि इतिहासका पान्नामा सुनौलो अक्षरले नाम लेखे । फिल्मको 'पूर्व पश्चिम रेल'ले युट्युबमा करोड बढी भ्यू पायो ।
फेरि ‘छक्का पन्जा’ले युट्युबमा अर्को रेकर्ड बनाएको छ । यो रेकर्ड पनि अहिलेसम्म कुनै पनि नेपाली फिल्मले बनाउन सकेका छैनन् । गीत जस्तै फिल्म ‘छक्का पन्जा’लाई पनि युट्युबमा करोडभन्दा बढी पटक हेरिएको छ । यो समाचार तयार पार्दासम्म युट्युबमा ‘छक्का पन्जा’ हेर्नेको संख्या १ करोड ४ हजार १ सय २९ छ । फिल्मलाई ५२ हजार बढी लाइक र ७ हजार बढी डिसलाइक मिलेको छ । यो फिल्मको नेम सिक्वेल 'छक्का पन्जा' २ असोज ११ गतेबाट प्रदर्शनमा आउने तयारीमा छ ।
फिल्म ‘छक्का पन्जा’मा दीपकराज गिरी, प्रियंका कार्की, जीतु नेपाल, केदार घिमिरे, बर्षा राउत, नम्रता सापकोटा, वुद्धि तामाङ लगायतका कलाकारको मुख्य भूमिका थियो । फिल्मलाई दीपाश्री निरौलाले निर्देशन गरेकी थिइन् ।
