मिति : २०७४ श्रावण ८, आईतवार

Nepal's No.1 Filmy Web Magazine

  • Current Rating
  • 1
  • 2
  • 3
  • 4
  • 5
(1 vote, avg 2.00/5.00)
Text size:-
+
-

हिट भयो ‘धनपति’ ?

फिल्मीखबर, काठमाण्डौ, 2017/07/15
असार २३ गतेबाट अल नेपाल प्रदर्शन आएको फिल्म ‘धनपति’ले हिजो शुक्रवारबाट दोस्रो हप्तामा प्रदर्शन आरम्भ गरेको छ । खगेन्द्र लामिछाने अभिनित फिल्म ‘धनपति’ले प्रदर्शनको दुईदिनमा करोड ग्रस विजनेश गरेको खबर प्राप्त भएको थियो । पहिलो हप्ता सुखद व्यापार गरेको ‘धनपति’ले दोस्रो हप्तामा पनि राम्रो दर्शक पाउने निर्देशक दीपेन्द्र के. खनाल बताउँछन् । 
 
फिल्मीखबर डटकमसँग कुराकानी गर्दै खनालले भने, ‘पहिलो हप्तामा नै हामीले फिल्मको लगानी सुरक्षित गरिसकेका छौं । दोस्रो हप्ताको पहिलो दिन शुक्रवार र दोस्रो दिन शनिवार पनि ‘धनपति’मा राम्रो दर्शक छन् ।’ उनले हिजो शुक्रवारबाट प्रदर्शनमा आएका दुई नेपाली फिल्म र एक बलीउड फिल्मले ‘धनपति’लाई असर नगर्ने पनि बताए । उनी अगाडि भन्छन्, ‘हिजो रिलिज भएका फिल्मभन्दा ‘धनपति’ विल्कुलै फरक छ । दर्शक पनि फरक छ । त्यसैले ‘धनपति’लाई हिजोबाट प्रदर्शन सुरु गरेका नेपाली र बलीउड फिल्मले असर गर्दैन ।’ 
 
यस्तै, कलाकार एवं लेखक खगेन्द्र लामिछानेले दर्शकहरुबाट पाएको प्रतिक्रियाले उत्साहित भएको बताए । उनले भने, ‘फिल्मले कति व्यापार गर्‍यौं, हिट भयो कि भएन भन्ने कुरामा मेरो खासै ध्यान जाँदैन । दर्शकहरुले फिल्म रुचाउनुभयो कि भएन भन्ने मात्र सोच्छु । समय मिलाएर हलहरुमा दर्शकहरुको प्रतिक्रिया पनि लिन गइरहेको छु । र, दर्शकहरुबाट राम्रो प्रतिक्रिया पाएको छु ।’ 
 
'पशुपतिप्रसाद'को सफलतापछि टुकी आर्ट्स प्रालिले दीपेन्द्र के. खनालको निर्देशनमा यो फिल्म निर्माण गरेको हो। खगेन्द्र लामिछानेको लेखन रहेको फिल्मको प्रमुख भूमिकामा पनि लामिछाने नै देखिएका छन् । 
 
खगेन्द्र लामिछाने बाहेक फिल्ममा सुरक्षा पन्त, आशान्त शर्मा, हरिहर शर्मा, मनिष निरौला, सुरभी बर्तौला, प्रकाश घिमिरे लगायतका कलाकारको अभिनय छ। 'धनपति'को सहायक निर्माता ओम गुरुङ, सह–निर्माता रजना नापित, समिर देवकोटा रहेका छन्। निर्माता भने रोजिना सिटौला रहेकी छन्।