चलचित्र पत्रकार संघ, नेपालको शुक्रबार बसेको कार्यसमिति बैठकले रेडियो नेपालका कार्यक्रम महाशाखा प्रमूख डा. नवराज लम्साललाई चलचित्र पत्रकारिता सम्मान प्रदान गर्ने भएको छ । लम्सालले चलचित्र पत्रकारितामा पुर्याएको योगदानको कदर गर्दै संघले सम्मान गर्न लागेको हो ।
त्यस्तै, अनलाइनखबर डटकमम मनोरञ्जन विधाको पत्रकारितामा लामो समयदेखी कार्यरत विजय सुवेदी (आवाज) र सगरमाथा टेलिभिजनमा कार्यरत पारस पौडेललाई चलचित्र पत्रकारिता पुरस्कार प्रदान गरिने भएको छ । चलचित्र पत्रकारितामा देखिएको सक्रियता र योगदानको कदर गर्दै विजय आवाज र पारस पौडेललाई पुरस्कृत गर्न लागिएको संघका महासचिव अनिल यादवले जानकारी दिए । पुरस्कार स्वरुप रु.२१ हजार नगद, ताम्रपत्र र ट्रफी प्रदान गरिनेछ । यसअघि पुरस्कार राशी रु.१५ हजार रहेकोमा यसपटकदेखी वृद्धि गरिएको हो ।
साथै, पहिलोपोस्ट डटकममा कार्यरत स्वेच्छा राउतलाई चलचित्र पत्रकारिता प्रोत्साहन पुरस्कार प्रदान गरिने भएको छ । पत्रकारितामा आवद्द भएको छोटो समयमा नै चलचित्र पत्रकारितामा सक्रिय स्वेच्छालाई प्रोत्साहन स्वरुप पुरस्कार दिन लागिएको हो । प्रोत्सान पुरस्कारमा १ थान ल्यापटप, ताम्रपत्र र ट्रफी रहनेछ । आगामी जेठ ७ मा हुन गईरहेको १८ औं स्थापना दिवसको अवसरमा सम्मान तथा पुरस्कार प्रदान गरिनेछ ।
'फिल्म खबर डटकम' को तर्फबाट सम्मानित तथा पुरस्कृत सबैलाई हार्दिक बधाई ।
