गएको बर्ष बलीउड अभिनेता शत्रुघन सिन्हाको आतिथ्यतामा भएको 'एलजी सिने सर्कल अवार्ड'ले यस बर्ष पनि निरन्तरता पाउने भएको छ ।
दिनेश डिसी संयोजक रहेको सिनेमा सर्कल नेपालको आयोजनामा हुने अवार्डका लागि नि:शुल्क चलचित्रको नाम दर्ता गर्न आह्वान गरिएको छ । आयोजक संस्था सिनेमा सर्कलले जारी गरेको विज्ञप्तीमा बैशाख १६ गतेभित्र २०७३ मा प्रदर्शनमा आएका चलचित्रहरुको नाम दर्ता गर्न उल्लेख गरिएको छ ।
जारी विज्ञप्तीमा अवार्ड हुने मिति भने सार्वजनिक गरिएको छैन । २३ विधामा वितरण गरिँदै आएको 'एलजी फिल्म अवार्ड' मा पर्दा पछाडीका प्राविधिक, पोष्टर डिजाइनर, स्टन्ट म्यान, छायांकन स्थलमा खाना पकाउनेसम्मलाई सम्मान र अवार्ड प्रदान गरिँदै आएको छ ।
आयोजक संस्था सिनेमा सर्कलले अनलाइनमार्फत नि:शुल्क चलचित्रको नाम दर्ता गर्ने व्यवस्था पनि मिलाएको छ । त्यसका लागि 'एलजी सिनेमा सर्कल अवार्ड २०७४' को अफिसियल बेवसाइट (https://goo.gl/forms/hpGYqd39l1J5Jz6S2) मा गएर नि:शुल्क फर्म भर्न सकिने अवार्ड संयोजक डिसीले जानकारी दिए ।
गएको बर्ष काठमाडौंको आर्मी अफिसर क्लबमा बलीउड अभिनेता शत्रुघन सिन्हा र उपराष्ट्रपति नन्दबहादुर पुनको प्रमुख आतिथ्यतामा ‘एलजी फिल्म अवार्ड २०७३’ सम्पन्न भएको थियो ।