आउँदो सालको दशैंमा प्रदर्शन हुने रेखा थापा आफैंले निर्माण गर्ने फिल्म ‘रुद्रप्रिया’ को सम्पूर्ण प्रि प्रोडक्सनको कार्य सकिएको छ । फिल्ममा रहने गीत रेकर्डिङ भएसँगै रेखाको ‘रुद्रप्रिया’ फ्लोरमा जान तयार भएको हो । यही चैत महिनाको अन्त्यबाट फिल्मको छायाँकन सुरु हुनेछ ।
सुरेश अधिकारीको संगीतमा तीन गीत तयार भएका छन् । जुन गीतहरु भिन्न भिन्न फ्लेवरको रहेको संगीतकार अधिकारीले बताए । ‘हरेक दर्शक तथा श्रोताको रोजाइका गीत बनेका छन्’ मंगलबार अनामनगरको गुञ्जन स्टुडियोमा गीत रेकर्डिङमा भेटिएका संगीतकार अधिकारीले छोटकरीमा भने ।
रेखाले पनि विगतका झैं यो फिल्मको गीतहरुले पनि दर्शकलाई मन पर्ने बताइन् । निर्देशक बबी सिंहले फिल्मको कथा अनुसार गीतहरु तयार भएको बताए । रेखा फिल्मसको प्रस्तुती रहने फिल्म ‘रुद्रप्रिया’ मा रेखा शिर्ष भूमिकामा प्रस्तुत हुँदैछिन् भने सुदर्शन थापा र अर्पण थापा महत्वपूर्ण भूमिका छ । फिल्मको रोचक पक्ष भनेको निर्देशक बनिसकेकी रेखासँगै अर्का द्वय निर्देशक सुदर्शन र अर्पण अभिनयमा हुनु छ ।
रमेश पौडेल कार्यकारी निर्माता रहेको फिल्ममा सरस्वती थापा निर्माता रुपमा रहेकी छिन् । फिल्मका सिनेम्याटोग्राफर सञ्जय लामा हुन् ।
