छायाँकनको लागी पोखरा जाँदै गर्दा फिल्म 'प्रेमगीत २' युनिट बोकेको गाडी दुर्घटनामा परेको छ । निर्माता सन्तोष सेन ,निर्देशक रामशरण पाठकसँगै अभिनेता प्रदिप खड्का र कैलाश कटुवाल सवार गाडी ट्रकसँग ठोकिएको थियो ।
धादिङको गल्छी भन्दा करिब ४ किलोमिटर अगाडी महादेववेसी नजिकै घुम्तिमा पुग्दा विपरित 'वे'बाट आएको ट्रकले उल्लेखित चार सवार जीपलाई ठक्कर दिएको थियो । 'फ्रण्ट टु फ्रण्ट' भएको ठक्करबाट निर्माता सन्तोष सेनको दाहिने हातमा चोट लागेको छ भने निर्देशक पाठकको टाउकोमा चोट लागेको छ । दुबैको अवस्था भने सामान्य छ ।
राजधानीको ट्रमा सेन्टरमा उपचाररत सेन र पाठकको एक्स रे रिपोर्टले सेनको दाहिने हातको 'कुहिना'मा चोट पुगेको देखाएको छ । एक्सरेमा हड्डी टुटेको देखिएपछि उनको अपरेशन गर्नुपर्ने छ । यद्धपी ट्रमा सेन्टरमा डाक्टरको समय नपुगेको बताईएपछि थप उपचारको लागी वि एण्ड वी अस्पताल ललितपुर लैजाने तयारी भईरहेको छ ।
'अकस्मात नसोचेको भयो, हाम्रो गाडीको गती ठिक नै थियो, ओभर स्पीडमा आएको ट्रकले घुम्तिमा पुग्दा सिधा ठक्कर दियो, सेनले गम्भिर मुद्रामा भने । निर्देशक र निर्मातासँगै रहेका दुई अभिनेताको अवस्था भने सामान्य छ । दुर्घटना पश्चात धादिङको महादेवेशीको क्लिनिकमा सामान्य उपचारपछि एम्बुलेन्सबाट सेन र पाठकलाई राजधानी ल्याईएको थियो ।
ठक्कर दिने ट्रक र चालकलाई प्रहरीले नियन्त्रणमा लिईसकेको बताईएको छ । भने अभिनेता र निर्देशक सहितको जीप भने निर्माता सेन आफैले चलाएका थिए । पोखराको छायाँकनको लागी बुधबार बिहान ५० जनाको टोली बोकेर तीन वटा गाडी राजधानीबाट छुटेका थिए । अभिनेत्री अश्लेशा ठकुरी भने अर्को गाडीमा थिईन् ।
यसैबीच ट्रमा सेन्टरको आकस्मिक कक्षमा उपचाररत सेन र पाठकको तश्विर लिन भने मिडियालाई दिईएन् । अभिनेत्री ठकुरीसँगै उपस्थित निर्माण टिमका सदस्यहरुले तश्विर लिन फिल्मीखबरकर्मीलाई रोकेका हुन् । तश्विर लिने भए वि एण्ड वी अस्पताल आउनु भन्दै ट्रमा सेन्टरमा तश्विर नलिन आग्रह गरियो ।
उता निर्माता र निर्देशक नै अकस्मात दुर्घटनामा परेर घाईते भएपछि फिल्मको छायाँकन तत्काललाई रोकिएको छ । फिल्मको छायाँकन कम्तिमा १ हप्ता रोकिने बताईएको छ ।
