अभिनेता दयाहाङ राई र अभिनेत्री प्रियंका कार्कीको जोडी पर्दामा राम्रै फिट छ अनि हिट छ । अभिनय यात्रा चलिरहँदा दया र प्रियंकाको प्रेमको अनि निकटताको चर्चा पनि गसिप बजारमा राम्रै चर्चामा रहन्छ ।
यो बीचमा यतिबेला लण्डनमा रहेको यो जोडीबीच प्रेमको कुरा चलेको छ । लण्डन पुगेरै दयाले रातो गुलाफसहित प्रियंकालाई 'आई लभ यू' बोलेका छन् । तर धेरै नसोच्नु, यो कुरा रियलमा नभई रिलमा नै हो । मिलन चाम्सको निर्देशनमा लण्डनमा छायाँकनरत फिल्म 'ह्याप्पी डेईज' को एक दृश्यको लागी दयाले प्रियंकालाई प्रेम प्रस्ताव राखेका थिए ।
मिलन चाम्सले निर्देशन गरिरहेको चलचित्र ‘ह्याप्पी डेज’को यतिबेला बेलायतका धमाधम छायाँकन चलिरहेको छ । फिल्मका लिड कलाकार भनेकै दया र प्रियंका हुन् ।
सबै दृश्य बेलायतमै खिचिने फिल्मको छायाँकन अझै एक महिनाजस्तो चल्ने बताईएको छ । फिल्मको अनुमानित बजेट १ करोड ७० लाख रहेको छ । अहिले क्याम्बर्ली, रिडिङ, फार्नबोरो लगायतका स्थानमा फिल्मको छायाँकन चलिरहेको बताईएको छ ।
