काठमाण्डौस्थित जमल नाचघरमा बिहिबार साँझ 'पाँचौं म्युजिक खबर म्यूजिक अवार्ड' सु-सम्पन्न भयो । सो अवार्डमा राष्ट्रकवि माधवप्रसाद घिमिरेलाई नेपाली साहित्यमा अतुलनिय योगदान रहेको कारणले 'पाँचौ म्युजिक खबर अवार्ड-२०७३' को अवसरमा 'म्युजिक खबर दिर्घ साधना सम्मान-२०७३' बाट सम्मान गरिएको थियो ।
उक्त अवार्डमा फिल्म 'प्रेमगीत'का संगीतकार अर्जुन पोखरेलको संगीत रहेको विभिन्न ६ वटा गीतले एउटै मञ्चमा अवार्ड पायो । पोखरेलले फिल्म 'प्रेमगीत'को 'म यस्तो गीत गाउछु'वाट संगीतकारको अवार्ड पाए भने सोही गीतबाट अन्जु पन्तले गायिकाको अवार्ड पाइन् ।
अर्जुनकै संगीत रहेको फिल्म 'प्रेमगीत'को 'म त अलपत्र पर्छु'वाट सत्यराज आचार्यले गायकको अवार्ड पाए भने सोही गीतवाट डा. कृष्णहरि बरालले गीतकारको अवार्ड पाएका थिए ।
त्यसैगरी अर्जुन पोखरेलकै संगीत रहेको 'ओई झुमा झुम्कावाली'वाट गायक प्रमोद खरेललेले अवार्ड पाए भने पप गायनबाट महिलातर्फ दुर्गा खरेलले 'काले काले केटाले'वाट अवार्ड पाएकी छिन् ।
संगीतकार अर्जुन पोखरेल अहिलेका सर्वाधिक चर्चित र व्यस्त युवा संगीतकार हुन् । अहिले उनलाई फिल्म मात्र हैन अन्य गीत संगीतमा संगीत दिन भ्याईनभ्याई छ । धेरै अवार्ड प्राप्त गरेका पोखरेलले आगामी दिनमा थप चुनौती र जिम्मेवारी थपेको कुरा उक्त मञ्चमा बताएका छन् ।
