चर्चित निर्देशक सुरज सुब्बा 'नाल्बो'का छोरा निर्देशक बनेका छन् । छोरा योदिन लिम्बु 'नाल्बो'ले म्युजिक भिडियोको निर्देशन गरेका हुन् । योदिनले निर्देशन गरेको म्युजिक भिडियोमा सुरजकी छोरी लाजिमा लिम्बुले अभिनय गरेकी छिन् ।
'सायद' फिल्ममा सुरज सुब्बाको सह-निर्देशक भएर योदिनले आफ्नो लक्ष्यको बाटो कोरेका थिए । निर्देशक भएर चिनिन चाहने योदिनले सुरजका प्राय सबै फिल्ममा सहायक निर्देशक भएर काम गरेका छन् । यसपटक भने उनले आँफैले म्युजिक भिडियो निर्देशन गरेका हुन् ।
'अनमोल' नामक एल्बममा रहेको बिरेन्द्र हाङ लावुङ लिम्बुको शब्द तथा तारा प्रकाश लिम्बुको संगीत र जगदिश समालको स्वर रहेको प्रस्तुत भिडियोमा लाजिमासँगै दिनेश गुरूङले पनि अभिनय गरेका छन् ।
निर्देशक सुब्बाले आफ्ना सन्तानको फिल्मप्रतिको झुकावमा खुसी व्यक्त गरेका छन् । हाल अमेरिकामा रहेका सुरजले छोरालाई निर्देशकको रूपमा नै चिनाउन चाहेको बताए ।
