१६ बर्ष पहिले बनेर व्यापारिक रुपमा हिट भएको फिल्म 'दर्पण छायाँ' अब नयाँ कथा अनि परिवेशमा बन्ने भएको छ । 'दर्पण छायाँ २' नाममा घोषणा भएको फिल्मलाई सिक्वेलको रुपमा भने लिईएको छैन् ।
फिल्म घोषणा कार्यक्रममा बोल्दै निर्देशक तुलसी घिमिरेले फिल्मलाई 'दर्पण छायाँ'को सिक्वेलको रुपमा नलिन आग्रह गरे । उनले भने, 'त्यो बेलाको कथा र प्रस्तुती समय सापेक्ष थियो तर अहिले समय बदलिएको छ, पात्र बदलिएका छन्, नाम सापटी लिईए पनि सिक्वेल भन्न मिल्दैन ।'
निर्देशक घिमिरेले नेपाली फिल्म उद्योगको लागी त्याग र बलिदानी दिनेहरुको युगको सम्भना स्वरुप सर्जकको छायाँलाई चिनाउने उद्धेश्यले फिल्म बनाउन लागेको बताए । फिल्मको १० प्रतिशत छायाँकन अमेरिकामा भईसकेको पनि उनले खुलाए ।
एक हप्ता भित्रै फ्लोरमा जाने यो फिल्ममा पुराना अनुहार भने कोहि दोहोरिएका छैनन् । डा. लोपसाङ लामाको प्रस्तुति तथा सबु गडाल कार्की र रबि कार्कीको निर्माणमा बन्ने फिल्ममा पुष्प खड्का, साहारा कार्की र श्रद्धा प्रसाईं लिड रोलमा हुनेछन् ।
रामेश्वर कार्कीले खिच्ने फिल्म साहारा फिल्मस् प्रोडक्शन प्रालीको पहिलो प्रस्तुतीमा तयार हुनेछ । जुलाईको दोश्रो हप्तासम्म छायाँकन सकाएर यो बर्ष नै रिलिज गर्ने योजना स्वरुप काम अघि बढ्ने निर्देशक घिमिरेले बताए ।
