फिल्म कहिलेबाट फ्लोरमा जाने तय भईसकेको छैन्, तर सिने वृत्तमा चर्चामा छ एक नाम 'मरिना' । सञ्चारकर्मी श्याम अर्यालको प्रस्तुतिमा बन्न लागेको फिल्ममा आर्यन सिग्देल लिड रोलमा रहने पक्का भएपनि महिलाप्रधान यो फिल्मको अर्को कलाकार को रहने टुंगो छैन ।
लिड अभिनेत्रीमा प्रियंका कार्की र वर्षा राउतको नाम चर्चामा हुँदैगर्दा निर्माण टिमले फिल्मको एक गीत प्रतियोगीताको लागी भन्दै सार्वजनिक गरेको छ । त्यसो त फिल्मका अर्का कलाकारमा गौरव पहारी पनि रहने पक्का भएको छ ।
प्रचारको नयाँ तरिका अपनाउँदै निर्माण टिमले यो गीतलाई प्रतियोगीताको रुपमा सार्वजनिक गरेको हो ।
कभर प्रतिस्पर्धाको लागी सार्वजनिक गरिएको उक्त गीतलाई 'र' फाईलको रुपमा लिईएको छ भने उक्त गीत गाएर युट्युवमा अपलोड गर्ने मध्येको उत्कृष्ट स्वरलाई फिल्ममा समावेश हुने सोही गीत नै गाउने अन्तिम मौका दिईने बताईएको छ ।
'पुरस्कारमा धनराशी राख्दा त्यो पैसा यत्तिकै खर्च हुनसक्छ, तर फिल्ममा नै गायनमा मौका दिईयो भने सांगीतिक क्षेत्रमा लाग्न चाहनेहरुको लागी थप उर्जा मिल्नसक्छ', निर्माता रतन थापाले भने । गीतलाई जुलाई ३० सम्ममा युटुबमा अनलोड गरिसक्नुपर्ने छ । अभिनेता आर्यनले पनि प्रतिभावान संगीत पारखिहरुलाई गीत गाएर स्टार बन्न आग्रह गरेका छन् ।
फिल्मलाई अनुप गिरीले निर्देशन गर्दैछन् भने निर्माण टिममा सह निर्माताको रुपमा राजेश थापा छन् ।
