विदेशका विभिन्न फिल्म फेस्टिभलमा सहभागी तथा पुरस्कृत फिल्म 'कालोपोथी'ले नेपाली मल्टिप्लेक्समा बम्पर विजनेस गरेको छ । फिल्मले पहिलो विकेण्डमा विदेशी फिल्मलाई समेत उछिनेको बताईन्छ ।
मल्टिप्लेक्समा मात्र रिलिज फिल्मले पहिलो तीन दिनमा ४० लाख ग्रस कलेक्सन गरेको वितरण कम्पनि पपकर्न पिक्चर्सका तर्फबाट माधव वाग्लेले जानकारी दिए ।
'मल्टिप्लेक्सको विजनेसले उत्साहित बनाएको छ, दैनिक रुपमा शो हरु थपिईरहेको छ, अर्को हप्ताबाट सिंगल थियटरमा पनि प्रदर्शन हुँदैछ', वाग्लेले भने ।
गत बिहिबार राजधानीमा गरिएको प्रिमियरबाट पनि फिल्मले निकै राम्रो प्रतिक्रिया पाएको थियो । माओवादी जनयुद्धकालमा मुगु जिल्लाको एक गाउँका दुई वालकहरुमा परेको प्रभावको कथालाई फिल्मले बोल्छ ।
मिनबहादुर भाम निर्देशित फिल्ममा वेनिशा हमाल, शुक्रराज रोकाया र खड्कराज नेपाली लिड रोलमा छन् ।
