युवा स्टार अनमोल केसीले अभिनय गर्ने चर्चाका बीच उनी बिना नै फिल्म 'ग्याङ्गस्टार ब्लुज'को कलाकार सार्वजनिक गर्दै औपचारिक निर्माण घोषणा गरिएको छ । बिसी मोसन पिक्चर्सको व्यानरमा बन्ने फिल्मलाई हेमराज बिसीले निर्देशन गर्नेछन् ।
बुधबार राजधानीमा आयोजित एक कार्यक्रममा निर्देशक बिसीले फिल्मका चार जना लिड कलाकार सार्वजनिक गरे । अनमोल केसी खेल्ने भनिएको फिल्ममा उनको स्थानमा आशिरमान देशराज श्रेष्ठ आएका छन् । आशिरमानले यसअघि 'सायद २' फिल्म छाडेको भन्ने समाचारबाट चर्चा पाएका थिए ।
त्यस्तै यो फिल्ममा लिड अभिनेत्रीमा निर्देशक हेमराजबाट नै अनमोलको अपोजिटमा 'जेरी' फिल्मबाट डेब्यू पाएकी आना शर्मा रहनेछिन् भने गौरम पहारी र प्रशान्त ताम्राकार पनि लिड अभिनयमा रहनेछन् ।
कार्यक्रममा मिडियामाझ निर्देशक बिसीले अनमोलको समय नमिलेको कारण अभिनयमा नअटाएको दाबी गरे । करिब ७ महिनापछि मात्रै फ्लोरमा जाने भनिएको फिल्मले तराई भेगको कथा बोल्नेछ ।
अहिलेका युवाहरु कसरी 'ग्याङ्गस्टार' बन्छन् र त्यो पश्चात उनीहरुको जीवनमा कस्ता परिवर्तन आउँछन् अनि ग्याङ्गस्टार बने पश्चात उनीहरुको जीवनमा पर्ने प्रभाव फिल्मले बोल्ने निर्देशक बिसीले सुनाए ।
फिल्मबाट 'सम्बोधन' निर्माता सरोज न्यौपाने र निर्देशक बिसीको पुनः टिमअप भएको छ । सरोज निर्माता रहेको यो फिल्ममा कार्यकारी निर्माताको रुपमा मनिष पण्डित छन् ।
कार्यक्रममा कलाकरहरुले आफ्नो आफ्नो पात्रको बारेमा समेत मिडियामाझ खुलेका थिए । भने निर्माता सरोजले हेमराज बिसीसँग आफ्नो 'ट्युनिङ' मिलेकै कारण पुनः निर्देशकमा दोहोरिएका बताए ।