फिल्म 'पशुपतिप्रसाद' पाईरेसी भएको छ । फिल्मीखबरले प्राप्त गरेको श्रोत अनुसार यो फिल्मको सेन्सर कपी पाईरेसी भएको छ ।
फिल्म जाँचपासको अधिकार प्राप्त निकाय सेन्सर वोर्डलाई फिल्म सेन्सरको लागी कुनै पनि फिल्मले 'वाटरमार्क' सहित फिल्म बुझाउने गर्छ । सोही अनुसार फिल्म 'पशुपतिप्रसाद'ले सेन्सर वोर्डको लागी प्रदान गरेको फाईल नै पाईरेसी भएको हो ।
फिल्मको सेन्सर कपी नै पाईरेसी भएको पाईएपछि फिल्म क्षेत्रकै विकास अनि विस्तार र प्रगतिको पक्षमा लाग्ने भनिएको रामचन्द्र ढकाल नेतृत्वको सरकारी निकाए सेन्सर वोर्डमाथि नै प्रश्न उठेको छ । फिल्मीखबरले प्राप्त गरको श्रोत अनुसार यो पाईरेसीले हुनमा सेन्सर वोर्ड सदस्य, सेन्सरमा काम गर्ने प्राविधिक या पोस्ट प्रोडक्सन स्टुडियो प्रति शंका उब्जाएको छ ।
अनाधिकृत रुपमा बाहिरिईएसँगै काठमाडौं आसपासका मोबाईल पसलमा समेत पेनड्राईभ मार्फत 'पशुपतिप्रसाद' बिक्री भईरहेको समेत हुनसक्ने आशंका छ । तर यति हुँदै गर्दा पनि फिल्म उद्योगको सर्वोच्च संस्था चलचित्र विकास वोर्ड अनि 'पशुपतिप्रसाद' फिल्म निर्माण कम्पनिले कुनै जानकारी पाएको छैन् ।
यसैबीच 'पशुपतिप्रसाद' निर्देशक दिपेन्द्र के खनालले यो फिल्म नेपालकै केहि हलमा प्रदर्शनको क्रममा रहेको बताएका छन् । निर्देशक खनालले फिल्म पाईरेसीको कुरा गर्दा आश्चर्य व्यक्त गर्दै यस्तो हुन नसक्ने दाबी गरे । काठमाडौंको गुण हल तथा अन्य केहि हलमा समेत फिल्म प्रदर्शनको क्रममा रहेको भन्दै विदेशका २० बढि देशमा प्रदर्शनको क्रममा रहेको उनले बताएका छन् ।
उनको यो कुरालाई आधार मान्दैगर्दा फिल्म पाईरेसी भईसकेकोले विदेश प्रदर्शनको लागी अधिकार लिने संस्था तथा निकायलाई ठुलो धक्का लाग्ने निश्चित छ । यो फिल्ममा खगेन्द्र लामिछाने, विपिन कार्की, बर्षा शिवाकोटी, रविन्द्रसिँह बानियाँ लिड रोलमा छन् ।
