यतिबेला नेपाली फिल्ममा कोही स्टार जन्मेका छन् भने ती हुन्, अनमोल केसी । अनमोलको लुक्स, उनको मेन्टेन, स्टारडम देखेर विभिन्न खालका चर्चा छन् । अनमोलको हातमा फिल्मको अफर यति धेरै छ कि, उनी आफै कुन गर्ने र कुन नगर्ने भन्ने दोधारमा देखिन्छन् ।
उनै अभिनेता अनमोल केसीसँग अहिले बजारमा देखिएका नयाँ अभिनेताको तुलना हुन्छ । कुनै नयाँ अभिनेता आए भने अनमोललाई टक्कर दिने, अनमोलको चुनौती भन्दै मिडियामा गसिप बन्ने गरेको छ ।यतिमात्र होइन, फिल्म बनाउने निर्माता र निर्देशक पनि अनमोललाई टक्कर दिने हिरो भन्दै गफ दिन पछि पर्दैनन् । फिल्म ‘होस्टेल रिटन्र्स’बाट नेपाली फिल्ममा आएका अभिनेता सुशिल श्रेष्ठको तुलना अनमोलसँग नै भयो ।
अनमोलको चुनौतीदेखि अनमोललाई टक्कर दिने भन्दै उनको तुलना गरियो । फिल्म त जसोतसो चल्यो तर सुशिल खासै चलेनन् । सुशील चलेका भए सबै नभए पनि कमसेकम केही निर्माता सुशीलको पछि पनि हुन्थे होलान् । तर सुशिलसँग मुस्किलले दोश्रो फिल्म छ । प्रेमगीतका अभिनेता प्रदिप खड्काको तुलना पनि अनमोलसँग नगरिएको होइन । अहिले अभिनेत्री छुल्ठिम गुरुङको निर्माण तथा अभिनय रहने नयाँ फिल्मको अहिले वर्कशप चलिरहेको छ ।
रमाइलो कुरा त के पनि रहेछ भने, यो फिल्मबाट एक नयाँ अभिनेता आउँदैछन् । जसलाई पनि अनमोललाई टक्कर दिने भन्दै निर्माणपक्ष भित्र चर्चा हुन थालेको छ । अनमोललाई टक्कर दिने हिरो भन्दै चर्चा भएकी उनको लुक्स पनि सार्वजनिक गरिएको छैन ।अनमोलनै निर्माता भएको फिल्म ‘म त तिम्रै हुँ’ बाट पनि आकाश श्रेष्ठ नामका युवकको उदय हुँदैछ । उनलाई पनि अनमोललाई टक्कर दिने हिरो भनेर भन्ने गरिएको छ ।फिल्म नगरिमा ह्यान्डसम कुनै हिरो आउने वित्तिकै अहिले अनमोललाई टक्कर दिने भनेर हल्ला गरिन्छ । यसले स्वयं उक्त कलाकारको परिचय भने गुम्ने खतरा देखिन्छ ।
